Mediu centenar de persones tán yá matriculaes nos programes formativos d’Iniciativa pol Asturianu pa esta primavera
Iniciativa pol Asturianu amplia’l plazu hasta'l domingu 27 de marzu p'apuntase a los Cursos d’Iniciativa pol Asturianu en Xixón, Uviéu, Avilés, Sotrondio y a distancia, entamaos en collaboración cola Academia de la Llingua Asturiana.
Los cursos van ser de nivel 1 n’Avilés y a distancia, y de nivel 2 n’Uviéu, Sotrondio y Xixón, con horarios distintos seguún el conceyu. Nel casu de Xixón, Avilés, y Uviéu, les clases son los llunes y miércoles de 19 a 21 hores, mientres qu’en Sotrondio l’horariu ye martes y xueves de 18:30 a 20:30. Los cursos a distancia nun tienen horarios fixos, l’alumnáu pue facer el cursu a la hora que-y venga meyor na plataforma dixital preparada pal mesmu.
El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu. El nivel II ta empobináu a persones con una conocencia más fonda del idioma, que yá ficieren dalgún cursu enantes o tengan l’asturianu como llingua familiar.
El preciu de la inscripción ye de 60 euros (50 pa los socios d’Iniciativa pol Asturianu), incluyendo los materiales necesarios pa llevar alantre’l cursu. Les inscripciones pueden facese na páxina web d’Iniciativa pol Asturianu o nel teléfonu 615 982 816, yá seya llamando o al traviés de Whatsapp o Telegram, hasta’l 27 de marzu.
Dende Iniciativa pol Asturianu animamos una ediciónn a participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies.
