L’eventu va cuntar cola dirección d’Inaciu Galán y la collaboración d’Iniciativa pol Asturianu y otres entidaes
XIXÓN, 10/09/2019. El pasáu mes d’agostu celebróse en Miranda del Douru, el territoriu portugués onde se fala asturianu, embaxo’l nome de mirandés, l’alcuentru añal de los escritores y defensores d’esta llingua, que llegaba a la so edición númberu doce, y nel que dende va yá años vien participando una delegación d’asturianos encabezada por Inaciu Galán.
Va agora cuatro años, los escritores en mirandés, encargaron a Inaciu Galán la organización n’Asturies del Alcuentru pal añu 2020, cola idea de tender pontes ente los dos territorios, que comparten una llingua, magar la distancia ente los territorios. Y esti añu nel Alcuentru, celebráu nel pueblu mirandés de Dues Eigreijas, zarráronse dalgunos detalles de lo que va ser la edición del añu qu’entra.
Agora, a menos d’un añu de la celebración del eventu, que tendrá llugar nel mes d’agostu de 2020, Galán adelantó dalgunos datos sobre l’actu: «La idea que tenemos ye convertir l’actu nun alcuentru ente tolos territorios del dominiu llingüísticu asturllionés, nun momentu especial pa una comunidá llingüística que tovía vive poco conectada, anque los llazos son cada vegada más estrechos, gracies sobre manera a les nueves tecnoloxíes».
Galán tamién anunció que “l’eventu va celebrase a lo llargo de dos o tres díes en dellos conceyos asturianos, teniendo como exa central dar a conocer n’Asturies la realidá del mirandés, asina como recibir a la xente que trabaya por esta variedá asturllionesa, faciendo porque se sientan como en casa».
Nestos momentos l’equipu dirixíu por Inaciu Galán, que quier que siga sumando xente, trabaya yá na programación y na busca de collaboraciones de tou tipu: «Queremos implicar a les instituciones d’Asturies, de Miranda y del restu del dominiu llingüísticu, asina como a les entidaes que trabayen pol idioma en cada llugar, pensamos que ye una oportunidá hestórica de construyir un futuru de mayor collaboración».
