Miles de persones percorrieron la cai Uría d'Uviéu na Manifestación pola Oficialidá na que participó per segunda ocasión Iniciativa pol Asturianu. Dende la organización consideramos la convocatoria d'esti añu un pasu alantre pola bona participación, anque ye importante siguir trabayando pa implicar a más asturianes y asturianos nel trabayu pol futuru del idioma.
Nesta ocasión la organización montó a lo llargo de la xornada un puestu informativu na Plaza La Escandalera nel que se fizo repartu de folletos, venta de productos y se charró coles persones que s'averaron al mesmu. Na manifestación, Iniciativa pol Asturianu estrenó pancarta col lema "Queremos un futuru pol asturianu", axuntando a esta globos y paragües.
Na xornada nueves persones sumáronse como socios, y pesie al día soleyeru qu'hebo, vendiéronse munchos paragües col lema "Nun te mueyes col agua… ¡muéyate pol asturianu!". Decenes de socios de la organización percorrieron la cai Uría xunto a otres persones que se sumaron a la organización colos característicos petos naranxes y otros elementos.
Pa Iniciativa pol Asturianu esta ye una fecha señalada y d'importancia nel calendariu de la reivindicación llingüística, pero hemos recordar que'l trabayu pol idioma ha facese cada día, caún nel so ámbitu y collaborando ente tolos asturianos, y por ello volvemos a animar a la xente a sumase a la organización, yá seya como sociu, collaborador o voluntariu n'actividaes y campañes.
Más de 50 semeyes de la presencia d'Iniciativa pol Asturianu
