El programa Iniciativa pol Asturianu nes ondes ta acabante publica la entrevista col deportista asturianu internacional

La organización Iniciativa pol Asturianu, que tien un programa radiofónicu dirixíu pol periodista Samuel Gradín, ta acabante asoleyar n'internet y na so rede d'emisores una entrevista col ciclista Samuel Sánchez, ciclista ganador d'etapes de La Vuelta y el Tour, y d'una medaya d'oru nes olimpiaes de Pequín. Na entrevista, na que Sánchez s'espresa n'asturianu, espresa la so opinión sobre l'asturianu, recordando que  "la llingua asturiana ye dalgo mui de nueso y nun hai que dexar que muerra", amás dexó bien clara la so postura sobre l'estatus que necesita l'idioma d'Asturies "l'asturianu tendría de ser oficial".

Dende Iniciativa pol Asturianu felicítase al ciclista asturianu pol so compromisu abiertu cola llingua asturiana. La so entrevista ye bona amuesa de la opinión de la mayor parte de los asturianos, que nun quieren que muerra la llingua de so, pero tien un especial valir pola so postura de figura pública.

Nun ye la primer vegada que personalidaes públiques amuesen el so sofitu al asturianu nel programa y nes actividaes d'Iniciativa pol Asturianu. Actores como María Cotiello y William Miller o'l músicu Mario Fueyo "Dark la eMe" son dellos exemplos, nun trabayu que busca concienciar a los asturianos de la importancia d'implicase na recuperación y futuru del asturianu.

Na entrevista con Samuel Sánchez tamién hai tiempu pa un repás a la so carrera como ciclista. Na mesma esplica como pa facer esti deporte "n'Asturies hai que ponese'l chubasqueru y salir a moyase peles carreteres", lo qu'esplica pue ser una ventaya "los ciclistes asturianos tenemos ventaya con otros por tar avezaos a les abegoses condiciones climatolóxiques pel iviernu del nuesu país".

Sobre los sos planes de futuru esplicó qu'esti añu va correr nel Giro d'Italia "pa tentar ganar una etapa nes tres grandes". Sobre lo negativo de la profesión destacó "prespáreste a tope y nes primeres etapes d'una gran carrera caes, ruempes unos güesos y tienes de dir pa casa". 

Sienti'l programa n'Ivoox o na nuesa rede d'emisores: Radio Sele, Radio Parpayuela, Radio Ujo, AllerFM, Radio L.lena, Radio Kras, Radio Noreña, Radio Nava, Radio Alma (Bruseles)… 

Sienti la entrevista a Samuel Sánchez equí.