El sábadu 9 de mayu tuvo llugar una edición más del Festival Pallabra nel mundu nel salón d'actos del Centru Valey de Piedrasblancas, en Castrillón. Un festival internacional que se celebra al mesmu tiempu en numberoses ciudaes del mundu y nel que l'asturianu tien una importante presencia.
Nel actu lléeronse poemes na nuesa llingua, cola presencia d'autores como Esti Rubio, Laura Calvo, Mariluz Pontón, Esther García, Virginia Gil, Berto García, Francisco Priegue, Marisa López Diz, Luis Suárez… asina como una intervención del presidente d'Iniciativa pol Asturianu, Inaciu Galán, y de la conceyala de Cultura, María Esther García López. Amás, hebo un conciertín del grupu Filanda, con dellos temes n'asturianu.
Les pallabres d'Inaciu Galán nel actu quixeron ser un llamáu a la sociedá asturiana pa puxar pola llingua asturiana. Ufrimos videu y discursu completu.
Mui bones. Esta nueche tengo l'honor de falavos nesti actu dientro del Festival de la Pallabra nel Mundu en representación de la organización que presido, Iniciativa pol Asturianu.
Pa nós ye un honor poder collaborar un añu más con esti eventu qu'axunta poesía y música alredor del mundu y que tien siempres un espaciu dignu pa la llingua asturiana.
Quixo'l destín qu'esti añu coincida l'actu dos feches importantes: la Selmana de les Lletres Asturianes y l'entamu de la campaña electoral que va llevanos a nueves corporaciones nos conceyos y nel Gobiernu d'Asturies. Y ye que'l futuru de la llingua asturiana ta fondamente xuníu al llabor que faigan o dexen de facer los responsable políticos. Pero cuidáu, los ciudadano ponemos a esos políticos nel llugar y polo tanto somos en gran parte responsables de lo que faen.
Nos cuarenta años últimos nun se fizo tolo necesario pa que l'asturianu recuperara'l llugar que merez como llingua con vitalidá y plenamente normalizada na vida de les asturianes y los asturianos. El trabayu fechu dende la sociedá civil, el profesoráu d'asturianu nes escueles ya institutos, y toles persones que collaboron en munchos ámbitos de la vida d'Asturies, fizo qu'anguaño heba un consensu cada añu mayor a favor del idioma d'Asturies.
Porque nun podemos dexar qu'una parte tan importante de la nuesa cultura, fundamental pa la nuesa identidá, un patrimoniu irrepetible, pueda perdese por culpa de la nuesa inacción.
Los asturianos consiguinos salvar munches de les nueses señes d'identidá del obstracismu: La sidra yera una bebida que nos años sesenta y setenta taba quedando arrequexada a los chigres y a la xente más vieyo, la gaita llegó a tar en peligru de desapaición con poquísimos gaiteros n'Asturies, qué dicivos del osu, el nuesu gran animal, l'asturcón… Munchos fueron los retos que se plantegaron a los asturianos y pa los que reclamamos a los nuesos gobernantes soluciones.
Cola llingua asturiana podemos consiguilo tamién. El tiempu cuerre en contra pero podemos solucionalo tovía. Pero tenemos que facer por ello. Porque los principales repondables son los represenantes públicos, que pueden tomar les midíes imprescindibles dende l'ámbitu de l'alministración. Pero nós, los asturianos, tenemos nes nueses manes la verdadera fuercia del idioma, somos los sos usuarios: usái l'asturianu, deprendéilu y tresmití-ylu a los vuesos fíos y nietos. Porque cuando acaba la tresmisión xeneracional del idioma nuna familia ye mui dificil volver a recuperar la llingua de casa nes futures xeneraciones.
Sicasí, les fuercies polítiques saben que namás una midida pue poner les bases pa garantizar el futuru del idioma: la oficialidá. Ye la ferramienta que llevamos 40 años reclamando y qu'ayeri mesmo sacó a miles de perdones n'Uviéu nun manifestación que se repite cada añu.
Necesitamos a tolos asturianos nesti llabor pol fururu del idoma. Implicáivos, acabái colos prexuicios y exixíi a los políticos que votéis que cumplan cola so obligación, salvar esti patromoniu y proyectalu hacia'l futuru.
Y güei, equí, esfrutái de los poemes y de la música. Munches gracies.
