El programa pue escuchase en 7 radios d’Asturies y en distintes plataformes dixitales como Ivoox, Spotify, Itunes y na páxina web alderiquesdasturies.com

XIXÓN, 13/02/2019 L’espaciu informativu “Iniciativa pol Asturianu nes Ondes” cumple 6 años n’antena. Esti programa mensual, qu’entamo en 2012, ta dirixíu y presentáu por Samuel Gradín y a lo llargo de los al rodiu sesenta minutos que dura la emisión, sirve pa conocer notícies del movimientu de reivindicación llingüística, entrevistes, música y hasta un pequeñu requexu pa deprender asturianu.

Samuel Gradín, llocutor con llargos años d’esperiencia en medios como La Voz de Galicia o la RPA, dixo nel día mundial de la radio que “tamos peragradecíos de l’acoyida col nuesu programa radio y el fechu normalizador qu’el mesmu lleva arreyáu”.

Hai que recordar que “Iniciativa pol Asturianu nes ondes” ye’l programa más antiguu n’asturianu que sigui aínda n’antena, amás nel mes de febreru anovó la so llínea sonora y estrenó podcast en Itunes y Spotify. El programa pue escuchase en 7 radios d’Asturies y en distintes plataformes dixitales como Ivoox, Spotify, Itunes y na páxina web alderiquesdasturies.com

P’acabar, el presentador Samuel Gradín apuntó que “nel día internacional de la radio hai que reconocer qu’esti mediu ye una ferramienta pa facer llegar a munches cases l’asturianu y güei ye un día de norabona pa nós pol trabayu fechu nestos años”.