Iniciativa pol Asturianu nes ondes, el programa d’esta organización, ufre un avance del so próximu programa, un entrevista especial colos actores María Cotiello y William Miller. Samuel Gradín, director del programa aprovecha la recién entrevista con Miller, nel programa +Gente, na primera de TVE, onde l’actor fizo una defensa del asturianu como llingua, dempués de les entrugues d’Anne Igartiburu sobre les llingües que fala, cuando Miller, pareya de Cotiello, esplicó que ta deprendiendo asturianu recordando a l’audiencia “que ye un idioma”.
Na entrevista, l’actor WillIam Miller recuerda que “ye necesaria la oficialización del asturianu”, una opinión que comparte l’actriz María Cotiello, que yá participó en delles campañes a favor del asturianu. Amás, dambos dos fálennos de les sos opiniones al rodiu l'asturianu ya el so papel como persones célebres nel espoxigue del so prestixu y l'espardimientu de la so conocencia.
María Cotiello (Xixón, 1982) ye una actriz asturiana de cine, teatru y televisión. Empecipió los sos estudios na Real Escuela Superior d'Arte Dramáticu en Madrid. Vivió en Mieres hasta'l 2000 y anguaño vive en Madrid por mor de la so carrera como actriz. Ente los sos trabayos más relevantes, atópase la serie de la Sesta, 'SMS, sin miedo a soñar', onde interpretaba a Eva na segunda temporada, la telenovela de TVE1 'Amar en tiempos revueltos' na qu'interpretaba a Matilde, la ficción propia de la canal paramount comedy, 'Ascensores'. Tamién participó na película Las 13 rosas, y en curtiumetraxes como "Almas Perdidas", "Ermymtrude y Esmeralda" o "Mañana todo va a ser mejor” y en teatru, n'obres como Presas, o Dios de Woddy Allen, dende los 16 años.
Los sos últimos trabayos en series fueron en Hay alguien ahí, y Los protegidos, en Antena 3. Nel añu 2009 sumóse la campaña "Doi la Cara pola oficialidá del asturianu”.
William Miller (Windsor, Inglaterra, 1978) da vida anguaño y na serie 'Isabel', de TVE, a Beltrán de la Cueva, un noble políticu y militar castellán, valíu d'Enrique IV de Castiella.
L’actor entamó los sos estudios d'interpretación na Aula d'Arte Dramáticu de la Universidá Rovira i Virgili. Tamién estudió nel Estudiu Juan Carlos Coraza de Madrid. Tien una llarga esperiencia en cine y televisión. Trabayó en películes como 'Águila Roja, la película' (2011), 'Oculto' (2006) o 'Salvador (2006)'. En televisión entamó cola serie El cor de la ciutat, en TV3, pa siguir participando en más entregues d'otres series como Cúntame cómo pasó, Los Serrano, Hay alguien ahí, Hispania o Aida, amás de les sos participaciones n’obres teatrales.
