Iniciativa pol Asturianu entama en comuña cola Academia de la Llingua Asturiana, la presentación y llectura del poemariu ‘’Aire, fuego y deseo’’.

UVIÉU, 18/02/2019. Inaciu Galán, presidente d’Iniciativa pol Asturianu, participó na tarde de güei na presentación de poemariu ‘Aire, fueu y deséu’ de Juan Carlos García Hoyuelos n’Academia de la Llingua Asturiana onde dixo que “xuntámonos equí güei toes y toos alredor de la figura de Juan Carlos García Hoyuelos, un home nel que la llingua asturiana tien un encontu na so difusión y promoción per otros territorios peninsulares y d’otros llugares. Dende va años vien poniendo atención nel asturianu dientro de la so esmolición poles llingües que nun tuvieron la suerte hestórica que tien la que ye la so llingua materna, el castellán”.

El presidente de la ONG comentó que “esta sensibilidá que demuestra Hoyuelos, ye un exemplu güei, cuando n’Asturies tamos tan cerca de poder algamar la reconocencia llegal pa les nueses llingües. Nun ye momentu d’estridencies nin de poner llinies o cavar trincheres, ye’l momentu de trabayar toes y toos xuntos empobinaos nel mesmu camín, el del consensu constitucional pola oficialidá. Ye’l momentu de siguir sumando sofitos a un elementu que la sociedá asturiana quier, que siente propiu, pero que si nun se faen bien les coses, podemos consiguir que caltrien otros discursos del odiu y el despreciu”.

Galán apuntó que “güei, más que nunca, la llingua asturiana nun pue ser elementu de confrontación, tien de ser un elementu d’alcuentru ente los y les demócrates, un elementu qu’amuese que quien cree na llibertá, quier que los y les falantes d’asturianu y gallego-asturianu tengan plena igualdá xurídica xunto a quien s’espresa en castellán”.

Inaciu Galán anunció amás que “nestos meses previos a les elecciones, que van ser tan decisivos pal futuru del idioma y d’Asturies, ye clave siguir amosando que del llau de la oficialidá tamos los que construyimos una Asturies meyor, más plural, más bayurosa, más respetuosa col diferente, una Asturies que cumple y desendolca la Constitución española”.

P’acabar, el presidente de la organización dixo que “nun se m’ocurre meyor actu pa entamar estos meses, col Día Internacional de la Llingua Materna nel horizonte más cercanu, qu’amosar la convivencia de les llingües como lo fai Juan Carlos nos sos llibros, con naturalidá, con normalidá y con ciñu, nun abrazu que mos hermana”. 

Faite sociu

Sofita la to llingua, dende solo 20€ pues collaborar con Iniciativa pol Asturianu

You have Successfully Subscribed!

Share This