La organización trabaya pa dar a conocer les sos propuestes a toles formaciones polítiques de cara al 25-M

XIXÓN, 22/03/2012. Dellos representantes d'Iniciativa pol Asturianu participaron nun conceyu colos candidatos de Bloque por Asturies-UNA-Los Verdes, Rafael Palacios y Yolanda Huergo, esti xueves pasáu, 22 de marzu. Esti conceyu encuádrase dientro de la petición fecha pol colectivu a les 22 formaciones polítiques que se presenten a les elecciones autonómiques n'Asturies el proximu 25 de marzu. Pel momentu, Iniciativa pol Asturianu aconceyó, amás de con Bloque, con Foru, Izquierda Xunida y Andecha Astur.

Nel conceyu, Iniciativa pol Asturianu, felicitó a los representantes de Bloque por Asturies-UNA-Los Verdes por usar l’asturianu a lo llargo de tola campaña, mesmo na so cartelería que na páxina web y nes intervenciones públiques de los sos llíderes. Esta ye la meyor forma d'amosar el so compromisu col idioma.

Amás, Iniciativa pol Asturianu reconoció la importancia de que Bloque por Asturies-UNA-Los Verdes lleve nel so programa la reclamación d’oficialidá, a la qu’habríen de sumase toles fuercies polítiques asturianes, pues más del 60% de los ciudadanos apoyen la declaración d’oficialidá.

Iniciativa pol Asturianu ufrió a la formación, tamién nesi conceyu, el so asesoramientu y collaboración en cuestiones llingüístiques.