Nos conceyos va falase de la reforma educativa, al respective de la situación del asturianu, asina como d’otres cuestiones sobre l’idioma nel ámbitu estatal.

Inaciu Galán, presidente d'Iniciativa pol Asturianu va a tar nel Congresu de los Diputaos, en Madrid, na tarde d’esti martes 12 de febreru, p’aconceyar colos diputaos de la circunscripción asturiana que dempués de convidar tanto a senadores como diputaos, quixeron recibir a la organización pa tratar cuestiones como la situación del asturianu cola nueva reforma educativa, l’usu de la toponimia oficial asturiana nes carreteres estatales y otres cuestiones qu’afecten a la llingua asturiana nel ámbitu estatal. Tán confirmaos conceyos con Antonio Trevín, diputáu de la FSA-PSOE, Carmen Maniega, diputa del PP d’Asturies, Enrique Álvarez-Sostres, de Foru Asturies, y Gaspar Llamazares d'Izquierda Xunida. 

 

Los conceyos, que van celebrase nos despachos del Congresu de los Diputaos, van servir como primer contactu colos diputaos asturianos en Madrid, a los qu'Iniciativa pol Asturianu va pidir que tengan una postura activa na defensa de la llingua asturiana nel ámbitu estatal, onde l'asturianu ta siempres marxináu por nun cuntar col estatus d'oficialidá. La idea del conceyu ye la d'informar de les cuestiones más importantes nestos momentos pal idioma, como la so presencia na reforma educativa, pero al mesmu tiempu ufrir unes llinies de trabayu de cara a facer una defensa continuada del idioma, y dir buscando solucionar problemes del idioma que provienen de la xestión del gobiernu central.

 

 

Entrega de cartes nel Ministeriu de Fomentu y nel d’Educación

 

Asina mesmo, el llunes 11, van entregase nes sedes del Ministeriu de Fomentu y Ministeriu d’Educación, cartes dirixíes a los respectivos ministros, cola fin d’amosar el refugu de la organización a la situación na quedaría la llingua asturiana d’aprobase la nueva reforma educativa, solicitando una solución que permita que l’asignatura tea pelo menos nes mesmes condiciones nes que ta agora, que yá son bastantes males, como yá espresó la Vocalía d’Enseñu de la organización en numberoses ocasiones, asina como la reconocencia de la especialidá d'asturianu pal profesoráu.

 

La carta dirixida al Ministru de Fomentu reclama que’l Gobiernu d’España cumpla col usu de la toponimia oficial nel territoriu asturianu, y anima a esti departamentu a usar l’asturianu con normalidá nes infraestructures, instalaciones estatales de tresportes, dependientes del mesmu y presentes n’Asturies: carreteres, ferrocarriles, aeropuertos, puertos, etc

 

En dambos casos solicitaráse tamién a los ministerios qu'usen l'asturianu na so páxina web, como faen col restu de llingües del estáu ya inclusive col inglés, que nun ye llingua oficial.