Xulio Casado y Carlos Pulgar, cabezaleros de la Xunta pola Defensa de la Llingua Asturiana, recibieron esti llunes 5 d’avientu a dellos miembros d’Iniciativa pol Asturianu na so sede d’Uviéu. Dambes asociaciones abrieron pontes de diálogu y collaboración nel ámbitu de la reivindicación llingüística. Iniciativa pol Asturianu treslladó a la Xunta la so decisión de sofitar la manifestación pola oficialidá del Día de les Lletres Asturianes del añu que vien.
Los miembros de la Xunta pola Defensa de la Llingua Asturiana desearon suerte a la nueva organización nun conceyu nel que dambes organizaciones valoraron de forma positiva la esistencia de delles organizaciones de reivindicación llingüística n’Asturies.
Los representantes d’Iniciativa pol Asturianu convidaron de forma oficial a la Xunta pola Defensa de la Llingua Asturiana al actu de presentación de l’asociación.
El conceyu encuádrase dientro de la rolda d’alcuentros que miembros d’Iniciativa pol Asturianu vienen faciendo dende va delles selmanes con colectivos y persones venceyaes al movimientu de reivindicación llingüística asturianu.
