Nesta edición, nel stand de la organización van participar once empreses de diferentes sectores qu’utilicen l’asturianu na so actividá comercial

L’espaciu d’Iniciativa pol Asturianu va contar amás con un apartáu pa presentaciones y charres

XIXÓN, 16/07/2019. Iniciativa pol Asturianu va participar otra vegada más na Feria Internacional de Muestres d’Asturies y amás va ampliar la so presencia con un espaciu más grande que nes otres ocasiones.

Nesta edición, que va celebrase del 3 al 18 d’agostu en Xixón, van tar presentes once empreses de diferentes sectores qu’utilicen l’asturianu na so actividá comercial y tovía hai dalgún espaciu llibre por si dalgún profesional o empresa quier sumase. Al traviés de la presencia na FIDMA, Iniciativa pol Asturianu quier mostrar como l’asturianu ye un elementu de creación empresarial, orixinando actividá económica, puestos de trabayu y, polo tanto, riqueza. Amás, con tola variedá de productos y servicios de les empreses, la organización quier facer ver como la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses.

Iniciativa pol Asturianu, que nun recibe nengún tipu d’ayuda pública, amplia amás el so stand na FIDMA que va contar con un espaciu pa charres, presentaciones de llibros, actos culturales, actos d’empreses y visites institucionales. La organización quier qu’esti espaciu seya un llugar d’alcuentru y un escaparate a la sociedá de la importancia que tien l’asturianu na economía asturiana.