Baxo’l lema “Oficialidá: el camín constitucional de futuru pal asturianu” representantes políticos de distintes sensibilidaes acompañaron a Iniciativa pol Asturianu n’Uviéu
UVIÉU, 03/05/2019. Iniciativa pol Asturianu participó un añu más na manifestación pola oficialidá d’esta tarde n’Uviéu coincidiendo col Día de les Lletres. La organización sumóse a la convocatoria llevando la so pancarta pol consensu constitucional pola oficialidá de la llingua asturiana. Amás de directivos y socios d’Iniciativa pol Asturianu, representantes de diferentes fuercies polítiques con representación institucional acompañaron a la ONG na so presencia na movilización.
Inaciu Galán, presidente d’Iniciativa pol Asturianu, dixo que “nun día tan importante pal idioma como güei nel que celebramos la conmemoración del 40 Día de les Lletres, tamos amosando n’Uviéu qu’alredor del asturianu hai un consensu ente distintes fuercies polítiques que queremos incrementar. Queremos que tolos partíos políticos de la Xunta Xeneral se sumen a esti consensu y vayan cola mayoría social d’Asturies”.
“Nesti momentu tenemos la llave pa salvar esta llingua y la sociedá yá ye consciente na so mayor parte d’esta necesidá ética de conservar un patrimoniu del altor d’un idioma. Y tenemos de siguir trabayando pa convencer a les fuercies polítiques qu’entá nun se sumaron a la oficialidá: PP y Ciudadanos. Nun podemos construyir el futuru del asturianu ensin ellos, anque seya posible si dan los númberos” apuntó Galán.
Inaciu Galán señaló que “nun hai qu’inventar nada. Namás buscar un modelu propiu d’oficialidá, afayáu a les nueses característiques, como se fixo nes demás comunidaes autónomes onde hai llingües propies, sumando a izquierdes y dreches. Mui cerca, en Galicia, tenemos l’exemplu del PP de Fraga y depués de Feijoo, qu’impulsaron les midíes de normalización que fixeron que güei’l gallegu, con tolos problemes que sigue teniendo, tea en muncha meyor situación de la que ta l’asturianu.
P’acabar, el presidente d’Iniciativa pol Asturianu recordó que “el 17 y 18 de mayu, xusto en metá de la campaña electoral, Iniciativa pol Asturianu va organizar una segunda edición del Seminariu: Oficialidá, el camín constitucional de futuru pal asturianu, onde volveremos a tener a los meyores espertos falando de qué supón de verdá la oficialidá, ensin manipulaciones malintencionaes, enseñando les esperiencies d’ésitu que se dieron n’otros territorios y sobre too, señalando lo que ye una realidá, la oficialidá nun va suponer imposición nenguna pa la ciudadanía, sinón mayores cotes de llibertá, democracia ya igualdá, asina como munches oportunidaes pa recuperar l’autoestima, pa una Asturies que vive gacha y con tantos problemes”.
Dalgunos de los representantes políticos presentes na pancarta d’Iniciativa pol Asturianu fueron:
- Mariluz Pontón, responsable d’Educación, Universidaes y Normalización Llingüística de la executiva de la FSA.
- Iván Ardura, Secretariu Xeneral de l’Agrupación Socialista de Xixón.
- Jonás Fernández, eurodiputáu del PSOE.
- Diego Valiño, conceyal del PSOE n’Uviéu.
- Lorena Gil, candidata de Podemos al Gobiernu d’Asturies.
- Segundo González, diputáu de Podemos nel Congresu de los Diputaos.
- Ángela Vallina, eurodiputada y candidata d’Izquierda Xunida al Gobiernu d’Asturies.
- José Suárez Arias-Chachero, ex conceyal del PP n’Uviéu.
- Inaciu Iglesias, ex conceyal de FORO en Noreña.
