La ONG aplaude’l nomamientu de Berta Piñán como conseyera y pide que los cargos intermedios tengan sensibilidá col idioma

Iniciativa propón que se ponga en marcha un Plan de Normalización Llingüística pa qu’entame a funcionar a principiu del añu que vien

XIXÓN, 22/07/2019. Iniciativa pol Asturianu fizo pública la so satisfacción pola creación de la Conseyería de Cultura y Política Llingüística y pol nomamientu de la escritora Berta Piñán como máxima responsable de la mesma pola so trayectoria.

La entidá aprovechó pa reclamar que dientro de la propia de la Conseyería los cargos intermedios seyan persones que tengan sensibilidá col idioma y recordó que’l llabor de la política llingüística tien que ser tresversal a tola acción de gobiernu. Pa ello, la organización aprovechó na mañana de güei pa reclamar la puesta en marcha d’un Plan de Normalización Llingüística pa qu’entame a funcionar a principiu del añu que vien intentando aprobalu a lo llargo del últimu cuatrimestre del añu, incluyendo esti plan midíes propies y concretes pa cada estaya de gobiernu. Nesti sentíu, ye importante tamién que les competencies de Política Llingüística nun se diluyan dientro de la gran conseyería creada. La meyor forma de garantizalo ye al traviés d’una viceconseyería con un presupuestu propiu y capacidá de trabayu tresversal na alministración autonómica.

Iniciativa tamién felicitó a Carmen Suárez, nueva Conseyera d’Educación, a la que-y pidió sensibilidá y voluntá pa desarrollar los planes que permitan una mayor presencia del asturianu con mayor y meyor calidá nel sistema educativu, trabayar pa consiguir la especialidá docente, facer medrar los planes pilotu col asturianu como llingua vehicular y garantizar que l’asignatura tenga una presencia digna dientro de tol sistema educativu, incluso nes etapes nes qu’agora nun ta presente como la Educación Infantil o la FP.

Dientro d’Educación ye tamién clave la esistencia d’un departamentu que mire pola presencia del asturianu y l’ameyoramientu de l’asignatura de Llingua Asturiana y Lliteratura. Pa ello, dende Iniciativa pol Asturianu proponemos una Dirección Xeneral dedicada a estes cuestiones.

Amás, pa Iniciativa tamién ye importante que les competencies sobre la RTPA tornen a tar embaxo’l paragües de la Conseyería de Cultura, Política Llingüística y Turismu, y que de forma áxil se busque anovar la dirección de la mesma, con perfiles claramente favoratibles a la normalización del asturianu y creando de forma interna una dirección de conteníos n’asturianu que trabaye nesi camín tan importante de da-y más presencia al idioma na RTPA, de forma tresversal.

P’acabar, Iniciativa pol Asturianu aplaudió l’usu del asturianu nel discursu d’Adrián Barbón na toma de posesión como Presidente del Gobiernu del Principáu d’Asturies que ye pa la organización un fechu inéditu y qu’hai que reconocer y agradecer.