Iniciativa pol Asturianu atopó un casu de pasos atrás pal usu del asturianu y la toponimia. El certame “Xixón de sidra”, qu’esti añu dexa nel so llogotipu nun tamañu ínfimu la forma “Xixón”, a favor de “Gijón”, cuando non la fai desapaecer, como ocurre nos toneles instalaos en tola ciudá. L’usu del asturianu nun campu siempres tan apegáu al nuesu idioma ye “inesplicable” pa la organización de reivindicación llingüística.
Yá solicitamos a les conceyalíes responsables, la de Turismu y la de Cultura qu’organicen esti eventu, al traviés de delles quexes en rexistru, y, amás, a la empresa contratada, Fenicia Marketing Gourmet, que tengan en cuenta l’usu del asturianu nesta y en futures ediciones, poniéndonos a la so disposición pal asesoramientu nesta cuestión.
Solicitamos amás a la Sociedá Mesta de Turismu del Conceyu de Xixón qu’efectúen un usu continuu del asturianu nes sos actividaes. L’usu del asturianu, xunto al castellán si se quier, nos cartelos de toles actividaes del conceyu, na publicidá, etc. nun supón gastu estra nengún pa les arques del Conceyu, yá que la torna pue facese na so propia Oficina de Normalización Llingüística, y la impresión d’una sola versión billingüe nun xenera gastu estra.
Usar l’asturianu xenera un arrequecimientu social y cultural pa una ciudá onde ye la llingua d’una parte importante de la población y seña d’identidá de tolos xixoneses y asturianos, y ye un estra de cara al turismu que lo ve como un elementu más de la nuesa cultura y como un atractivu turísticu.
Reclama l'usu del asturianu nesti eventu na so páxina en Facebook
