El programa “La nueche ye tuya” venía usando l’asturianu dende va años y agora la so publicidá apaez namás en castellán

UVIÉU, 20/01/2012. Dende Iniciativa pol Asturianu queremos denunciar un nuevu pasu p'atrás nel usu del asturianu por parte del conceyu d'Uviéu. Esta vegada, trátase de la programación de fuelgu xuvenil "La nueche ye tuya" que facía un usu billingüe del asturianu y del castellanu, mesmu na denomación que nes feches de toles actividaes. L'añu anterior, amenorgóse la presencia del idioma asturianu, emplegándolu namái na denomación y, esti añu desapaez dafechu, amosando en tola cartelería y publicidá únicamente: "La noche es tuya"

Si la normalización social del idioma, por parte de los socesivos equipos del Gobiernu llocal, yera yá bien probe y deficiente, nos últimos años tamos asistiendo a un desaniciu del asturianu en tolos sitios onde ganara un espaciu. Un exemplu claru foi la desapaición del asturianu de la so web va poco más de dos años.

L'asturianu ta siendo la víctima d'una casa conceyu que representa a la segunda mayor población d'Asturies y que fai poco o nada por respetar la Llei d'Usu y por da-y puxu al idioma dende les instituciones. Hai que recordar qu'Uviéu nun cuenta nin con un Serviciu de Normalización, nin ta trabayando na recuperación de la toponimia, nin tien plan nengún de normalización social del idioma.

Poro, dende Iniciativa pol Asturianu, vamos esixir a los responsables de toa esta llaceria qu'adquieran el compromisu de dar pasos nuevos nel usu d'un idioma que ye patrimoniu de toos.