La organización denunció esti martes ante la Conseyería d’Educación l’absoluta desidia na búsqueda d’una solución pa la situación del profesoráu d’asturianu

“Nesti momentu la situación ye mui grave porque tenemos a cientos d’alumnos ensin profesor a lo llargo de más de dos meses de cursu”

Inaciu Galán, presidente d’Iniciativa pol Asturianu, denunció que “a estes altures del cursu siguen ensin ponese profesores d’asturianu hasta en seis centros de secundaria. Esiximos a la Conseyería qu’abra les llistes de profesoráu yá que va pa dos meses que dellos centros educativos nun tienen profesoráu porque la llista ta agotada. Por ello, Iniciativa pol Asturianu solicita a los responsables d’Educación del Gobiernu d’Asturies l’apertura de la llista de manera inmediata y que tomen les midíes necesaries pa solucionar esta cuestión a mediu plazu”.

Galán añadió que “proponemos aumentar les places d’asturianu nel máster de profesoráu de secundaria y pa ello Iniciativa pol Asturianu yá se punxo en contautu cola Universidá d’Uviéu pa solicitar esti cambéu y que nel cursu prósimu puedan llegar a doblase. Ye importante amás que les places d’asturianu dexen de ser, mayoritariamente, medies xornaes de tal manera que dalgunes places que s’asitien en conceyos alloñaos del centro d’Asturies seyan más atractives pa la escoyeta”.

“Nesti momentu la situación ye mui grave porque tenemos a grupos d’alumnáu ensin profesor a lo llargo de más de dos meses de cursu y ensin horizonte de solución a curtiu plazu y por ello reclamamos a la Conseyería que tome midíes de manera urxente” apuntó’l representante de la organización.

El presidente d’Iniciativa pol Asturianu amestó que “esti problema que se da nos centros públicos vése tamién espeyáu nos centros concertaos onde tamién numberosos colexos siguen ensin profesoráu d’asturianu. Como cada añu, la Conseyería retrasa la llegada del profesor d’asturianu y otorga menos hores de les que tien d’impartir el docente al centru, de tal manera que tán dándose situaciones tamién de falta de profesoráu na etapa infantil, onde la propia Conseyería d’Educación afirmó que diba garantizase nesti cursu que l’asignatura d’asturianu diba tener una presencia normal nesos niveles.”

Inaciu Galán remató diciendo que “esti asunto ye mui grave ya qu’a fin de cuentes esta situación xenera que nun haya una verdadera llibertá a la hora d’estudiar asturianu. Esta situación dase tamién poles condiciones llamentables nes que vive’l profesoráu de llingua asturiana, ensin poder acceder a unes oposiciones y siempres como profesoráu interín. Agora que tanto n’Asturies como en Madrid gobierna’l PSOE nun hai razón nin escusa pa nun poner reconocer yá la especialidá d’asturianu nel decretu correspondiente, un cambiu bien cenciellu y que nun supón coste dalgún».