“Termináu esti primer trimestre tenemos un nuevu casu d’un estudiante de Llangréu que dende setiembre lleva ensin clas”

“Nun entendemos cómo ye posible que’l Gobiernu d’Asturies nun actúe d’una manera seria y contundente”

Inaciu Galán, presidente d’Iniciativa pol Asturianu, dixo güei que “Iniciativa pol Asturianu fai públicu un nuevu casu de falta de profesoráu d’asturianu y denunciamos esta situación dempués de poner una quexa va un mes pola mesma situación n’otros centros educativos”.

“La Conseyería ha poner solución a esti tratu llamentable del alumnáu que decide escoyer asturianu de forma voluntaria y tien qu’atopase con esta situación que da vergoña y que supón una marxinación de los neños y neñes, n’aules masificaes y onde s’axunten cursos distintos, lo que pedagóxicamente ye inalmisible y xenera descontentu nes families y nel alumnáu” apuntó Galán.

Inaciu Galán comentó amás que “termináu esti primer trimestre tenemos un nuevu casu d’un estudiante de Llangréu que dende setiembre lleva ensin clases. Dende Iniciativa pol Asturianu paeznos que ye mui preocupante ver como pasa’l tiempu, mientres conocemos más casos, denunciándolos públicamente y el Gobiernu sigue colos brazos cruzaos. Nun entendemos cómo ye posible que’l Gobiernu d’Asturies nun actúe d’una manera seria y contundente pa garantizar dalgo tan simple como ye la enseñanza llibre y voluntaria del idioma”.

Pa terminar, el presidente d’Iniciativa pol Asturianu pidió’l cumplimientu de la Llei 1/98 de 23 de Marzu, d’Usu y Promoción del Asturianu (BOPA Númb.73, del 28-III-98) y l’aplicación de la sentencia ratificatoria del Tribunal Supremu d’abril de 2012.