Aurelio Argel morrió güei sábadu de forma prematura. Dende Iniciativa pol Asturianu queremos amosar el nuesu pesar pola muerte d’esti críticu musical y periodista fondamente comprometíu cola llingua asturiana y cola difusión de la cultura asturiana, con especial llabor nel campu musical, mesmo como críticu que como dinamizador y promotor d’iniciatives culturales dende bien mozu.

Con esta perda marcha un home comprometíu cola llingua asturiana y con Asturies. Queremos acompañar nesti momentu de dolor a la so familia y a les munches persones que lu queríen.

Argel ñació en Soto Rei en 1963 y trabayó en medios como Radio Asturias-Cadena SER, los 40Princiales, La Voz de Asturias, La Nueva España o’l periódicu Les Noticies, amosando siempre’l so compromisu col usu del asturianu, con iniciatives como los sos programes Música para raptar princesas y El Ruxideru o siendo xuráu del Liet International (l’Eurovisión de les llingües minorizaes) o del programa de la TPA, Cantadera. Tou esti trabayu yera nes sos propies pallabres lo que-y prestaba pero nun-y daba de comer, un trabayu militante que-y queremos reconocer dende Iniciativa pol Asturianu pola so aportación a la nuesa cultura y a la so difusión.

 

Imaxe: La Nueva España