 12.21.03.png)
Tolos diputaos asturianos menos los del Partíu Popular apoyen les dos enmiendes presentaes nel Congresu
La votación de les dos enmiendes a los Presupuestos Xenerales del Estáu 2014, propuestes por Iniciativa pol Asturianu y presentaes por Foro ya Izquierda Xunida nel Congresu de los Diputaos, tuvieron un amplísimu apoyu nes votaciones celebraes estos díes. Sicasí, Iniciativa pol Asturianu llamenta que los diputaos asturianos del PP votaren en contra d'estes enmiedes dempués de les pallabres positives qu'espresaren les diputaes populares Ángeles Ahuja y Carmen Maniega na visita que-yos fizo'l presidente de la organización nel mes de febreru, na sede parllamentaria, en Madrid.
La organización aguarda que'l Partíu Popular apoye a la fin estes enmiendes nel trámite que van pasar pel Senáu nestos díes, yá qu'ensin los votos del PP, que tien mayoría absoluta nes dos cámares, ye imposible aprobar esta partida pa l'Academia de la Llingua Asturiana, la única de les academia de llingües d'España que nun tien una partida nel Presupuestu estatal.
Iniciativa pol Asturianu quiere felicitar de nuevo a Foru ya Izquierda Xunida por presentar estes enmiendes y a les formaciones que votaron a favor d'una o otra, o de dambes dos, toles formaciones, sacantes el PP, UPyD y nel casu de la de Foru, Esquerra Republicana de Catalunya, anque'l so llider na cámara, Joan Tardà, comentó que foi por mor "d'un erru procedimental". Nel Senáu toes estes formaciones tendrán una segunda oportunidá pa camudar el so votu.
