Nesta entrega nueva d'Iniciativa pol Asturianu nes ondes charramos col célebre ciclista Samuel Sánchez, qu’amosó’l so apoyu a la oficialidá del asturianu. A propósitu de la última polémica sobre l'usu del nuesu idioma nel trabayu alministrativu de los conceyales de Noreña, tarán con nós Inaciu Iglesias, de FAC, y Pablo Pérez Fonseca, de Conceyu Abiertu, qu'ofrecerán la so opinión al rodiu d'esti asuntu tan llaceriosu.
Pablo Canal de l'asociación "El Cencerru" de Valdesoto, nel conceyu Siero, esplícanos la tradición de "Los Sidros y Les Comedies". Tará tamién nel nuesu programa Denis Soria, miembru de la direutiva d'Iniciativa pol Asturianu, denunciando'l documentu remitíu a los trabayadores de la RTPA (Radio televisión Pública d'Asturies) onde se restrinxe a los mesmos l'usu del asturianu o onde se-yos esixe presentalu de manera diglósica.
Rafael Rodríguez Valdés del Serviciu de Normalización Llinguística del conceyu de Corvera falónos del nuevu cursu d’asturianu qu’entamen esti mes.
Asina y too, podréis sentir la valoración per parte d'Iniciativa pol Asturianu del so aconceyamientu colos diputaos asturianos nel Congresu -en Madrid- na voz del so presidente Inaciu Galán. Pa rematar, deprenderemos como cada día un pocoñín d’asturianu cola nuesa maestra Ana María Suárez.
El programa, órganu de difusión del coleutivu, ta dirixíu por Samuel Gradín, emítese en Radio Sele, Radio Ujo, AllerFM, Radio Ḷḷena, Radio Kras, Radio Noreña, Radio Nava, Radio Alma (Bruxeles)… y puede sentise tamién nes canales d'Iniciativa pol Asturianu n'Ivoox y YouTube. Amás, tamos tamién tolos llunes a les 18 hores en Radio Parpayuela, pa tolos conceyos de los Montes Centrales.
