Esti vienres 8 de mayu los asturianos y asturianes volvemos a salir a la cai pa reivindicar la reconoencia del estatus llegal d'oficialidá pal idioma nel Día de les Lletres Asturianes. Dende Iniciativa pol Asturianu volvemos a sofitar un añu más esta manifestación, participando de la marcha y animando a tolos nuesos socios, simpatizantes y en xeneral, a la sociedá asturiana, a llevantar la voz pola so llingua, cada añu más en peligru, nesti actu festivu y reivindicativu que llenará les cais de la capital asturiana.
Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial.
Especialmente importante ye esti añu amosar la postura de los asturianos al respective de la oficialidá, pues tamos a poques selmanes d'una convocatoria electoral que pue decidir el futuru de la llingua asturiana a mediu y llargu plazu. Tenemos que dexar claro a los partíos que la posición contraria a la oficialidá del asturianu dificilmente pue defendese dende una postura democrática, yá que supón, non solo la perda d'un patrimoniu cultura ya identitariu importante, sinón la falta de drechos d'una parte de la población d'Asturies.
La Manifestación pola Oficialidá va salir el vienres 8 de mayu a les 19:30 hores de la Estación del Norte d'Uviéu. Animamos a toles persones enfotaes nel futuru del idioma a participar con nós na manifestación organizada pola Xunta pola Defensa de la Llingua Asturiana, qu'esti añu cumple 30 años. Aprovechamos pa felicitar a esta organización pol so llabor a lo llargo de les caberes décades.
Iniciativa pol Asturianu recuerda dempués de la manifestación va celebrase nel Teatru Campoamor la Xunta Estraordinaria de l’Academia de la Llingua Asturiana y que la entrada ye llibre y de baldre. Animamos a la xente a participar d'esti actu de sofitu a la institución.
