Na tarde d’ayeri na Xunta Xeneral d’Asturies compareció n’una comisión el director de la Radiotelevisión del Principáu d’Asturies (RTPA). Na so declaración espresaba qu’esperaba que los partíos decidieran el porcentaxe de programación n’asturianu que quieren que tenga la canal. 
Dende Iniciativa pol Asturianu, ensin dexar de llau la responsabilidá del director de la RTPA na escasa ufierta de programación n’asturianu de la canal, queremos animar tamién a los verdaderos responsables últimos, los partíos de la Xunta Xeneral, esperando que tomen decisiones y faigan porque la RTPA tenga infraestructura y medios pa usar de forma más intensa l’asturianu.
Pa ello proponemos, como venimos faciendo dende va años con distintos informes y peticiones, que se cree una dirección específica de conteníos n’asturianu na RTPA, que curie porque la presencia del asturianu vaya medrando de forma tresversal y digna en tolos ámbitos del ente, tanto nos programes d’entretenimientu como nos informativos, cine, programación infantil, deportes y otros formatos.
Son los partíos representaos los responsables últimos de que l’asturianu tenga una presencia amañosa na RTPA, y yá saben qué facer. Yá la Llei d’Usu y Promoción del asturianu aprobada en 1998, falaba de la necesidá de da-y una presencia afayadiza, nel so artículu 13.2.
La RTPA nun pue siguir considerando al asturianu como un elementu secundariu y qu’apaez de forma folclórica, tien que formar parte del so llabor como serviciu públicu convertise nun ente que promocione y normalice l’asturianu.
