“Agradecemos les disculpes, pero ye’l momentu de pasar de les pallabres a los fechos”

Iniciativa pol Asturianu, a traviés del so presidente Inaciu Galán, agradeció les disculpes del alcalde de Siero, Ángel García, dempués de los comentarios fechos nuna visita a un colexu.

Galán dixo que “agradecemos les disculpes, pero ye’l momentu de pasar de les pallabres a los fechos. Nun podemos quedanos solo con bones pallabres. Ye’l momentu de dar pasos hacia la normalización del asturianu en Siero”.

El presidente d’Iniciativa pol Asturianu añadió que “la situación del asturianu en Siero ye grave. El conceyu sigue ensin ordenanza d’usu del asturianu, magar que s’aprobó en plenu y a qu’hai un testu que tien el vistu bonu de los servicios xurídicos del Gobiernu d’Asturies. Lleva tres años esperando que se lleve a plenu y creemos que ye un bon momentu p’aprobala y ponela en marcha”.

Inaciu Galán comentó tamién que “nun esiste nenguna política llingüística nin plan de normalización nin se ta cumpliendo col usu la toponimia oficial, nin nel nuevu llogotipu del Conceyu nin na páxina web onde la versión n’asturianu ye de mentira porque nun tien siquiera conteníos actualizaos. Amás, el Serviciu de Normalización Llingüística sigue a media xornada y ensin recursos”.

Galán terminó diciendo que “la meyor manera de sofitar l’asturianu ye dando una solución a toes estes cuestiones y ponese a trabayar d’una manera seria, por eso pedimos al alcalde de Siero pasar de les pallabres a los fechos”.

Siente equí les declaraciones d’Inaciu Galán, presidente d’Iniciativa pol Asturianu.