Inaciu Galán, presidente d’Iniciativa pol Asturianu quixo recordar güei a Pablo González, cabezaleru del PP de Xixón, que los sos ataques “enllenos de radicalidá y falta d’empatía contra l’asturianu, nun faen más que llevar al PP a la marxinalidá, pues tán fuera de la realidá y lloñe del apreciu y el cariñu que los y les xixoneses tienen pa col asturianu”.

La ONG recuerda “momentos muncho más acertaos na postura del PP de Xixón pa col asturianu, como na época de Pilar Fernández Pardo, que se posicionó a favor de la oficialidá, usaba l’asturianu con normalidá y por ciertu, tuvo a piques de facese cola alcaldía de Xixón, llegando a tener 12 conceyales, frente a los 3 que sumen nesti momentu los populares con discursos radicales contra l’asturianu que nun atopen apoyu, a la vista de la resultaos, ente los y les votantes de Xixón”. Y tampoco dientro del PP, onde los estudios sociollingüísticos espliquen que cuasi la metá de los sos votantes, son favoratibles a la oficialidá.

Iniciativa pol Asturianu pide al conceyal popular que muestre “d’ónde salen esos datos que da sobre l’usu del asturianu nes rellaciones cola alministración llocal” y en tou casu “reclamamos respetu a los ciudadanos y ciudadanes que s’espresen n’asturianu y que nun son namás aquellos que tuvieron la oportunidá de formase pa poder escribir na so propia llingua”. Dende Iniciativa pol Asturianu recuerden que la mayoría de les rellaciones ente la ciudadanía y l’alministración faense de forma oral, y ehí nun esisten estadístiques pa saber cuántes persones usen l’asturianu, pero cualquier que ponga la oreya en cualquier oficina municipal sabe que l’asturianu ye una llingua ambiental habitual ente la ciudadanía, a pesar de la falta de midíes d’apoyu y de la seguridá xurídica qu’otorgaría a los falantes la oficialidá, que güei niega’l PP a la ciudadanía”.

Inaciu Galán quixo esplicar tamién que mientres Pablo González diz que “por encima de su cadáver” van reconocer los drechos de los falantes, nós, dende Iniciativa pol Asturianu, tamos trabayando pa que se reconozan los drechos de les persones que quieran espresase n’asturianu y la supervivencia del idioma, pero tamién, el drechu de Pablo González pa nun usar l’asturianu si nun quier. Mientres unos lluchamos por que se cumpla la Constitución española, que remarca la oficialidá de los Idiomes propios xunto al castellán, el PP ponse del llau de quien quier incumplir la Constitución y dexar fuera de la llegalidá a una parte importante de la ciudadanía y fuera de la protección más que razonable, a un patrimoniu cultural y llingüísticu de gran valir, como ye l’asturianu.

Pablo González fala d’imposiciones, cuando les úniques vienen per parte del PP, prohibiendo l’usu del asturianu nel parllamentu, queriendo dar pasos atrás na normalización, fecha por ciertu embaxo’l mandatu d’una llei impulsada por un gobiernu autonómicu del PP, la Llei d’Usu del asturianu de 1998.

Con too y pesie a los ataques del PP, dende Iniciativa pol Asturianu, recuerden al PP que siempres tienden la mano al diálogu na construcción del consensu constitucional pola oficialidá del asturianu, yá qu’esta tien de ser una cuestión d’amplios consensos tresversales.

Faite sociu

Sofita la to llingua, dende solo 20€ pues collaborar con Iniciativa pol Asturianu

You have Successfully Subscribed!

Share This