Iniciativa pol Asturianu acaba de presentar una quexa formal al Ayuntamientu de Siero y a la Conseyería d’Infraestructures, Ordenación del Territoriu y Mediu Ambiente  polos últimos cambeos de señalización na parroquia de La Collá.

L’asociación pide nos escritos presentaos al conceyu y al Principáu la reposición de la señalética colos nomes tradicionales de la parroquia. Iniciativa pol Asturianu denuncia que la señal de la carretera onde apaecía’l topónimu yá derogáu *La Collada foi eliminada, pero nun se sustituyó por una señal nueva, quedando ensin señalar la entrada a la parroquia de La Collá, siendo esti el topónimu oficial. Anque la instalación y mantenimientu de les señales na carretera AS-248 son competencia del Gobiernu del Principáu d’Asturies ye responsabilidá del Conceyu de Siero tar vixilante y facer cumplir de la llexislación nel so territoriu.

Por otra parte, Iniciativa pol Asturianu fae público tamién que les dos señales del llugar de Güergu, perteneciente a la parroquia, apaecen de forma incorrecta como *Güergo.

Nesti sentíu hai que recordar que la Llei 1/1998, de 23 de marzu, d’usu y promoción del bable/asturianu diz nel artículo 15.1, relativu a los topónimos que “los topónimos de la Comunidá Autónoma del Principáu d’Asturies han tener el nome oficial na so forma tradicional”. Y nesi sentíu, los topónimos oficiales son La Collá y Güergu.

Dende Iniciativa pol Asturianu pedimos la instalación de les nueves señales, dando cumplimientu d’esta manera a la Llei 1/1998 y a la toponimia oficial aprobada, d’acuerdu col decretu 104/2009  del BOPA de 29 de xunetu d’oficialización de la toponimia del conceyu de Siero.

Faite sociu

Sofita la to llingua, dende solo 20€ pues collaborar con Iniciativa pol Asturianu

You have Successfully Subscribed!

Share This