“Ye’l meyor homenaxe que los partíos pueden facer pa celebrar estos 15 años d’oficina”

“Valoramos el constante llabor de la Oficina de Normalización Llingüística de Xixón que dempués de tantos años cuenta con un espaciu dignu”

Representantes d’Iniciativa pol Asturianu participaron esta selmana na presentación de la esposición sobre los 15 años d’oficina. Al términu de la visita, Inaciu Galán, presidente d’Iniciativa pol Asturianu, desplicó que “Iniciativa pol Asturianu va proponer a los partíos aprobar una moción en defensa de la Oficina de Normalización Llingüística, de los sos trabayadores y de tol llabor na normalización del asturianu nel conceyu. D’esta manera pretendemos consiguir un sofitu públicu del restu de partíos frente a los ataques inxustificaos, radicales y fuera de llugar del PP a esti organismu. Dende la nuesa organización creemos que ye’l meyor homenaxe que los partíos pueden facer pa celebrar estos 15 años”.

Galán recodó que “en 2008 la mayoría del plenu del Conceyu de Xixón aprobó la Ordenanza Municipal del Usu del Asturianu. En marzu de 2016, PSOE, Foro, Xixón Sí Puede, Izquierda Xunida y Ciudadanos daben el sí al Plan de Normalización del asturianu vixente, quedando el PP solu n’abstención. Esta ye una prueba más nel avance del consesu social qu’arrodia al asturianu y verdaderamente ye una pena qu’el PP quede na marxinalidá nesti asuntu”.

Pa terminar, el Presidente d’Iniciativa pol Asturianu dixo que “valoramos el constante llabor de la Oficina que dempués de tantos años cuenta con un espaciu dignu. Actividades como ‘Saca la llingua’, pallabreros, talleres y la rellación colos comerciantes y hosteleros pa fomentar l’usu del idioma faen qu’esti ente seya esencial pa que l’asturianu siga teniendo una presencia cada día mayor na sociedá xixonesa”.

Siente equí les declaraciones d’Inaciu Galán, presidente d’Iniciativa pol Asturianu.