Iniciativa pol Asturianu vien de solidarizase nestes caberes selmanes con dos situaciones perpreocupantes pal futuru de dos llingües, el guaraní y l'aragonés.
Hai delles selmanes, Iniciativa reafirmábase una vegada más na so postura pública de refuga a la situación qu'anguaño ta viviendo'l guaraní, llingua del 90% de la población paraguaya y que vien de ser retirada de la Educación Media nesi país. Nesti sen, la organización amosó una vegada más la so solidaridá col Ateneo de Cultura y Lengua Guaraní, organización cola que Iniciativa entamó rellaciones hai un añu y que ye miembru de la so Rede de Contautos Internacionales (RCI).
D'otra miente, hai dellos díes el parllamentu de la Comunidá Autónoma d'Aragón aprobaba la nomada "Llei de Llingües", pola qu'imponía los nomes artificiales de LAPAPYP al aragonés y de LAPAO al catalán falao na Comunidá, dexando a dambes llingües nuna situación llaceriosa y empeorando les sos perspeutives de preservación y proteición. Nesti sen, Iniciativa pol Asturianu dirixóse al Consello d'a Fabla d'Aragón, organización igualmente miembru de la RCI.
Iniciativa pol Asturianu, con estes declaraciones, quier reafirmar el so compromisu pa cola defensa d'aquelles llingües del mundu que güei siguen ensin la reconocencia debida o que nun disfruten de les garantíes necesaries p'asegurar la so proteición.
