Esti mes pasáu vimos como los contactos institucionales entamaos por Iniciativa pol Asturianu colos diputaos asturianos el pasáu mes de febreru nel Congresu de los Diputaos teníen los sos frutos en forma de dos enmiendes a los Presupuestos Xenerales del Estáu, d’Izquierda Xunida y Foru, reclamando la inclusión d’una partida pa l’Academia de la Llingua Asturiana n'ellos.
El PP quedó solu ente los partíos que representen a los asturianos nel Congresu votando en contra d’estes enmiedes. Y quedó solu porque ye de xusticia y sentíu común que l’Academia asturiana seya tratada nes mesmes condiciones que’l restu de les academies de les llingües del estáu español. Naide entiende lo contrario, y por eso les enmiendes tuvieron el sofitu de partíos de toles tendencies… toos tán d’alcuerdu en positivo, menos el PP y UPyD.
Hai trés coses bien positives nesti casu. Per un llau qu’Izquierda Xunida volviera presentar la propuesta, como yá fizo nel Senáu l’añu pasáu al pidi-ylo con menos tiempu; que Foru, la segunda fuercia política n’Asturies, ficiera de so esta reivindicación presentando una enmieda propia, y tamién, un cambiu d’actitú del PSOE no que cinca al asturianu, pues votaron a favor tolos diputaos del PSOE nel Congresu, gracies al impulsu que pudimos facer nel conceyu que tuvimos con Antonio Trevín en febreru.
Tamién ye positivo saber que’l PP, magar que votó en contra, dio razones de tipu económicu pa facelo, non argumentando contra’l fechu en sí de que l’Academia tenga un presupuestu estatal. Esto plantega un precedente importante pa futures situaciones más positives no económico.
En xeneral podemos tas satisfechos, porque pesie a que la propuesta entá nun salió alantre, alredor del asturianu siguen construyéndose consensos importantes como esti, que si siguimos trabayando acabarán por trayer meyores noticies pa la nuesa llingua. A los ciudadanos, a la militancia llingüística, a toos, tenemos que pidivos que faigáis tola presión que podáis a los vuesos represenantes nel Congresu, pa que terminen por apoyar esta y otres iniciatives que plantegaremos nel futuru a favor del nuesu idioma.
