Esti mes Uviéu acueye la celebración de los Premios Príncipe d’Asturies, organizaos pola fundación que lleva’l mesmu nome. Independientemente de la opinión de caún sobre si han celebrase o non estos gallardones, la celebración cuéstanos una importante cantidá de dineru a tolos asturianos y lo menos que s’habría esperar d’ellos ye un mínimu respetu a la llingua y cultura del territoriu onde s’asitien. Namás como exemplu, nos presupuestos últimos la Fundación recibió más de 700.000 euros solo ente’l Gobiernu d’Asturies y el Conceyu d’Uviéu.
La Fundación Príncipe d’Asturies nun usa l’asturianu nin siquier d’un mou simbólicu nesti actu nin na so actividá a lo llargo del añu. La so páxina web, que pue vese hasta n’once llingües, nun inclúi al asturianu. Esto nun ye más qu’un exemplu de la nula presencia del nuesu idioma, que merez menos espaciu nestos premios que cualesquier otra llingua del mundu.
Si comparamos con otres instituciones asemeyaes, veremos que la otra fundación del Príncipe, la Príncipe de Girona, tien la la web en catalán, amás d’en castellán, y usen, la fundación y los Príncipes, esta llingua de forma normal en tolos actos.
En pasando la edición d’esti añu va recibinos la Directora de la Fundación Príncipe d’Asturies y esperamos que con esti conceyu cambie esta política d’escaezu y marxinación del asturianu per parte d’esta institución y que los Premios Príncipe de 2013 seyan los primeros onde l’asturianu seya normal.
Nesi mesmu sen reclamamos apocayá que la web de la Casa Real, institución de la xefactura del estáu al que pertenez Asturies, nun usa l’asturianu, marxinándolu frente al castellán, pero amás cola nueva versión, tamién frente a gallegu, catalán y vascu. Entá nun recibimos respuesta nenguna de la Casa Real. Taremos sollertes pa que l’asturianu tea presente en tolos ámbitos, porque nun podemos dexar que la nuesa llingua se marxine de forma sistemática per parte de les instituciones que dicen representanos.
