Iniciativa pol Asturianu propunxo en 2013 a los grupos políticos con representación asturiana nel Congresu la presentación d'una enmieda a los Presupuestos Xenerales pa que l'Academia de la Llingua Asturiana cuntara con una partida, como tienen la española, catalana, vasca y gallega. La propuesta cuntó colos votos favorables de tolos grupos, menos PP y UPyD, y por ello nun pudo aprobase.
Esti añu volvimos a solicita-yos a los grupos nel Congresu la presentación d'una enmieda parcial a los Presupuestos Xenerales del Estáu que reclame una partida pa l'Academia de la Llingua Asturiana, qu'acabe con esti agraviu y lo que consideramos una inxusticia pa la llingua asturiana. Na propuesta de Presupuestos pa 2015 la Real Academia Española tien una partida de 1.618.910 €, l'Institut d'Estudis Catalans de 273.070 €, la Real Academia Galega de 273.070 € y l'Academia de la Lengua Vasca (Euskaltzaindia) de 143.180 €, amás, la Comisión Permanente de la Asociación de Academias de la Lengua Española tien un prespuestu asignáu de 74.560 euros.
A día de güei sabemos qu'Izquierda Xunida y Foru Asturies confirmaron que tienen presentada la propuesta y trabayamos pa consiguir el sofitu del restu de les fuercies polítiques, pa que, como l'añu pasáu, haya una importante mayoría a favor. Los diputaos represenantes d'Asturies nel Congresu formen parte del PP, PSOE, Izquierda Xunida y Foro Asturies, pero ensin el votu a favor del PP ye imposible sacar alantre esta propuesta. La formación esplicó l'añu pasáu que nun podíen crear partíes nueves, porque yera un prespuestu pa reducir, pero esti añu la situación cambia y esperamos que nun se busquen otres escuses y qu'esti añu podamos cuntar col votu favorable del PP.
