La Xunta Xeneral d'Iniciativa pol Asturianu, celebrada esti sábadu 23 de febreru nel Auditoriu d'Uviéu, aprobó'l nomamientu de dellos nuevos cargos. Teno Prau Tuñón foi aprobáu como nuevu Ayalgueru, dempués de dellos meses en funciones, en sustitución d'Ana María Viesca Iglesias, que tuvo que dexar el so cargu por razones personales, pero sigue como collaboradora. Casu asemeyáu ye'l de Sabel Tuñón Ces, a la que sustitúi na Vocalía de Voluntariáu, Xurde García Cilleros, pasando Tuñón al cargu de vice-vocal.
Amás, David Suárez 'Triskelo', ta agora al cargu de la promotora del grupu de trabayu de la organización n'Uviéu, col envís de da-y puxu a la organización nesti conceyu, como un entamu del espardimientu d'Iniciativa pol Asturianu pel máximu númberu de conceyos posible. Andrés Astur Treceño quedó tamién al cargu de la campaña que va entamar la organización alredor del usu del asturianu y de la toponimia tradicional nos medios de tresporte.
Los nomamientos van permitir reforciar estayes de la organización que necesitaben d'un mayor puxu y qu'agora cunten con responsables directos que van poder trabayar xenerando equipos pa llevar alantre los oxetivos d'Iniciativa pol Asturianu.
(Na semeya: Teno Prau, nuevu Ayalgueru)
