Inaciu Galán, presidente de la organización, dixo nel so discursu que se ta “lluchando por salvar al idioma contrarreló”

Iniciativa pol Asturianu celebró na tarde d'esti sábadu 23 de febreru, la so Ier Xunta Xeneral de socios nel Auditoriu d’Uviéu. L’actu abrióse con un discursu del so presidente, Inaciu Galán nel que dixo que la organización cumplió munchos de los oxetivos que se plantegó, recordando, sicasí, que “hai muncho por facer, hai coses pendientes y proyectos nuevos”. Galán espresó la necesidá de “xenerar un clima social de sofitu a la llingua asturiana, en contactu con asociaciones, partíos, y en xeneral, tola sociedá civil, a pie de cai”.

Galán llamentó tar énte “un idioma que muerre, una clas política que nun pon soluciones y una sociedá entá poco concienciada”, pero foi positivu no que cinca a les posibles solcuiones “el llabor nun ye fácil, pero consiguimos xenerar una ferramienta útil pa trabayar pol futuru del idioma”, recordó. Pidió a los socios y demás asistentes al congresu que crearan “conciencia a favor de la llingua asturiana  cada día, usándola con normalidá, mostrando lo positivo que ye tener un idioma y la responsabilidá que supón caltenelu pa les futures xeneraciones”.

Nesta Xunta presentóse l’Informe de Xestión 2012 a los socios onde se recueyen les numberoses actividaes reivindicatives y culturales entames pola organización per tol territoriu asturianu, siendo aprobáu por unanimidá, xunto al informe económicu. Aprobóse, amás, un presupuestu y plan d’actividaes pa 2013, ente lo que destaca una campaña cola que va facese por implicar a les empreses nel usu del asturianu y un refuerciu de la presencia nes cais d'Asturies. Diose’l preste tamién a delles figures nueves d’asociáu de cara a facilitar l’afiliación de persones con pocos recursos, nun momentu de crisis económica como esta, asina como pal sofitu d'empreses.

No que cinca a les cares nueves na directiva, aprobáronse nuevos cargos de la organización, como’l del nuevu Ayalgueru, Teno Prau Tuñón, o’l Vocal de Voluntariáu, Xurde García Cilleros, al que va acompañar como vicevocal, Sabel Tuñón, hasta agora a la cabeza de la vocalía.

 

Semeyes de la Ier Xunta Xeneral