L'IES Emilio Alarcos niega a un grupu d'alumnes la posibilidá de cursar Llingua Asturiana y dícen-y a la madre d'una d'elles que tendría que dir a otru centru a recibir asturianu
Una madre pidió ayuda a Iniciativa pol Asturianu pa denunciar la situación que tán viviendo la so fía y otres alumnes d'un grupu de la ESO nel Institutu Emilio Alarcos de Xixón. Dempués de matriculase na asignatura nos plazos establecíos, el centru esplicó a les alumnes que nun había matriculaos abondo pa facer un grupu de l'asignatura de Llingua Asturiana, cuando la llexislación, una sentencia del Tribunal Superior de Xusticia d'Asturies y el mandatu de la Conseyería d'Educación pa esti cursu, especifiquen que la petición de cursar l'asignatura de Llingua Asturiana de namás un alumnu tien que se tresformar automáticamente na puesta en marcha de l'asignatura nesi cursu.
Dempués de qu’Iniciativa pol Asturianu informara a la madre de la situación llexislativa, el centru camudó los sos argumentos y agora diz que la profesora de Llingua Asturiana tien toles hores ocupaes, alvirtiendo a la madre que la neña habría de dir a otru centru a recibir Llingua Asturiana, nuna rocambolesca "solución" que buscaba a les clares que la neña y la madre desistieren de la petición de cursar Llingua Asturiana. Lo más grave ye que'l centru nun tien más que solicitar el profesoráu necesariu a la Conseyería d'Educación, si ye que les hores contrataes pa Llingua Asturiana nun son abondo. Revisando na información pública de la Conseyería pue vese como la profesora de Llingua Asturiana del IES Emilio Alarcos trabaya namás a media xornada, colo que too sedría ampliar la xornada de la profesora o unviar otru docente. Sicasí, estes cuestiones alministratives son independientes de la situación de les alumnes que solicitaron cursar Llingua Asturiana, que nun son responsables d’esta situación sinón suxetos de drechu.
Por más que venimos recordando a los centros que nun hai sistema de ratio mínimu d'alumnos matriculaos pa poner clases d'asturianu, estes situaciones siguen pasando. Y ye qu'esti sistema illegal de ratio mínimu foi derogáu pola sentencia confirmatoria de la Sala de lo Contencioso-Alministrativo, Estaya Cuarta, del Tribunal Supremu, con fecha 24 d'abril del 2012, tres que'l Gobiernu d'Asturies recurriere la sentencia del Tribunal Supremu d'Asturies qu'eliminaba la ratio d'ocho alumnos matriculaos establecida pol gobiernu asturianu y que per munchos años evitó l'accesu a l'asignatura a munchos alumnos, yá qu'esti usábase como xida pa nun introducir l'asignatura en centros onde la dirección taba en contra de la so implantación, diciendo siempres que nun se formara grupu, anque fuera mentira.
La Conseyería y l'IES Emilio Alarcos tienen que dar solución d'inmediatu a esta situación y a otres munchos que tán dándose de xuru per Asturies, pero que pola falta d'información de les families y l'alumnáu nunca lleguen a denunciase. Miembros d'Iniciativa pol Asturianu van acompañar esta selmana a la madre denunciante nes sos denuncies y reclamaciones frente al IES onde estudia la fía y la Conseyería d'Educación, esperando da-y solución a esti casu concretu y qu'esta llamentable situación valga d'exemplu pa munchos alumnos y families que viven situaciones asemeyaes y a los qu'animamos a denunciar, cuntando col nuesu sofitu. Recordamos que “tolos alumnos de primaria a bachilleratu tienen drechu a tener l'asignatura de Llingua Asturiana o Gallego-asturiano na so zona, ensin escuses de nengún tipu en tola rede, pública, privada o concertada del sistema educativu asturianu”.
