Iniciativa pol Asturianu saca alantre  esti cursu  de creación poética de 16 hores, nel que va desendolcase  una repasada poles distintes dómines na llírica asturiana, dende les primeres manifestaciones hasta los enclinos más actuales.

Esto ye, van vese dalgunos aspeutos básicos y de calter divulgativu que van ser el marcu pa la creación, pente exercicios que van combinar el maxín, l’alcordanza y la espresión oral.

El temariu a siguir va ser el siguiente, cuntando colos posibles cambios ya incidencies q’asocedan nel trescursu del taller, venceyaos a la participación y el perfil de los alumnos y los sos conocimientos previos:

 

​-Presentación: ¿Cuál ye’l to versu?

-La lliteratura popular: cuentos, cantares, cosadielles y refranes

– Primeros llibros n’asturianu

– De Marcos del Torniello a Rodrigo Cuevas

– “Vamos dexar de vivir de gaita, sidra y tambor…”

-“Llevantar una casa que seya como un árbol…”

-¿Y agora?: situación actual, autores mozos y futuru

-Fin del cursu: llectura de poemes y testos que surdieren nes clases

Un cursu con muncha fame de poesía

Diego Solís (Xixón, 1991), escritor y poeta en llingua castellana ya asturiana. Ye’l fundador y coordinador del colectivu Fame Poétika col qu’editara les antoloxies Fame Poétika (La Manzorga, 2013) y Seguimos con Fame (Rema y Vive, 2015). Ye miembru del Conseyu de redaición de la revista de lliteratura moza Formientu. Forma parte de la Xunta directiva d’Iniciativa pol Asturianu, col cargu de secretariu teúnicu. Ye collaborador n’estremaos medios, como la RPA nel programa ‘La radio es mia’, revistes como El cuaderno o Anáfora, y ye conocíu, amás, por ser ún de los poetes más activos na divulgación y na xestión d’eventos poéticos del país col colectivu que fundara años atrás y col que día a día trabaya en nueves formes d’averar la poesía a la xente.