Iniciativa pol Asturianu organiza esti vienres 22 de setiembre la charra “Situación y actualidá del Aragonés” na que se quier dar conocencia del estáu d’una llingua vecina y que puede tener semeyances pa col asturianu. La conferencia va ponela Chuserra Barros, miembru de l’asociación aragonesa Nogará y que, de xuru, va esclariar les duldes al rodiu del idioma aragonés. Amás va haber un turnu d’entrugues y d’alderique moderáu por Inaciu Galán, presidente de l’asociación Iniciativa pol Asturianu.
L’actu pretende entamar un ciclu de conferencies que va tener como protagonistes a otres llingües y realidaes minorizaes que van tener llugar nos prósimos meses. L’eventu va facese esti vienres 22 de setiembre a les 19:30 hores na Sociedá Cultural Xixonesa na Cai Balmonte de Miranda, 4.
