Iniciativa pol Asturianu pide que s’ameyore y caltenga ‘l traductor Eslema

Espublizao 08/06/17

Iniciativa pol Asturianu pidi públicamente a la Conseyería d’Educación y a la Universidá d’Uviéu, xestores y coordinadores d’esta ferramienta tan útil, qu’ameyoren esti serviciu que nos últimos meses ta xenerando problemes d’accesu y funcionamientu.

La organización sabe de la importancia d’esta plataforma que sirve pa facilitar el trabayu de traducción y torna de testos n’asturianu a otres llingües y viceversa, siendo un referente y un gran sofitu pa muncha xente qu’usa l’idioma tolos díes o bien tien l’envís de deprendelu. Poro, encamienta a les autoridaes pertinentes a que tomen midíes nesti sen y faigan qu’esta ferramienta seya d’utilidá pa la ciudadanía, dando más fondos o teniendo’l procuru de que se caltenga con eficiencia lo que yá hai.

                                                                               

Dende Iniciativa pol Asturianu entendemos que ye preciso un alcuerdu ente la Conseyería d'Educucación y Cultura y la Universidá d'Uviéu pa qu'esti traductor tenga una dotación económica añal que permita dir meyorándolu y caltener en condiciones la so actividá. Ye bien importante teniendo en cuenta que los grandes traductores como'l de Google nun dan esta opción llingüística y esta ye la única ferramienta qu'esiste nesti campu.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.