Iniciativa pol Asturianu y el Conseyu de la Mocedá de Xixón ponen en marcha un grupu informal de conversación n'asturianu

Espublizao 30/12/16

Iniciativa pol Asturianu collabora col Conseyu la Mocedá de Xixón pa poner en marcha la so primer esperiencia con grupos informales de conversación n'asturianu. Los Grupos Informales de Conversación son una iniciativa del Conseyu de Mocedá empobinada a toles persones que quieren perder el mieu a falar n'otru idioma, o a cencielles practicar les sos conocencies nel propiu nun ambiente distendíu ya informal. Los grupos nun son clases d'idioma, sinón espacios nos qu'echar la parpayuela y tán dinamizados polos nuesos equipos de voluntariáu.

La entrada ye llibre y de baldre, y nun se precisa apuntase enantes. Esti nuevu grupu, que se suma a los esistentes hasta agora n'otres llingües, va celebrase nel llar del CMX ya Iniciativa pol Asturianu, n'Avenida Manuel Llaneza, 68, baxu. 33208, en Xixón. El grupu va entamar el miércoles 11 de xineru, y va celebrase tolos miércoles de 19 a 20:30 hores. 
 
Dende Iniciativa pol Asturianu animamos a participar d'esti grupu y a perder el mieu a usar l'asturianu en tolos ámbitos. Una bona forma de faelo ye entamar nesti tipu d'ambientes desenfadaos onde los nuevos falantes van poder poner en práctica l'usu oral del idioma. 
 

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.