La Real Academia Española vuelve a maltratar al asturianu como nos peores tiempos. Nin la nuesa visita al so llar en Madrid, en 2012, con un informe baxo’l brazu solicitando’l cambiu de denomación d’asturiano, bable y asturleonés nel so Diccionario, nin les decenes d’apoyos que teníemos, de profesores d’universidaes d’Asia, Europa y América sirvieron pa que la RAE entrara en razón y reconociera a la llingua asturiana nel so diccionariu, como a les demás, como lo que ye según tola comunidá ciéntifica internacional, un idioma.

La RAE fizo cambios y caltúvolos bien en secretu hasta la salida del testu impresu pa evitar que tuviéremos marxe d’acción política pa tratar esti tema fuera del ámbitu filolóxicu, pero nun lo van consiguir, a lo llargo d’esti mes viniente llevaremos la cuestión, de nuevo, a les fuercies polítiques asturianes y fadremos porque se pronuncien.

Hai que recordar que mientres l’Academia de la Llingua Asturiana ye la única d’ente toles academies de llingües del estáu que nun tien partida nos Presupuestos Xenerales del Estáu, la comunidá autónoma d’Asturies, ye la única (xunto a Cantabria y Murcia) que financia a la RAE con una partida nos sos presupuestos pa la Fundación Pro Real Academia Española.

Les nueves definiciones del Diccionario de la Lengua Española, siguen ensin reconocer al asturianu como “llingua”, y amás introducen na definición el términu inventáu de “los bables”, dalgo inesplicable y frutu de prexuicios aciéntificos más propios d’otros tiempos que del sieglu XXI. ¿Qué tipu d’amenaza ye la nuesa pequeña llingua pa que la RAE nun quiera reconocela con normalidá?

Iniciativa pol Asturianu va planta-yos cara, y espera cuntar col sofitu de les fuercies polítiques que representen a los asturianos y que nun pueden permitir un agraviu como esti hacia la nuesa llingua, nun testu de referencia internacional como ye’l Diccionario de la Lengua Española, que financiamos tamién los asturianos, y que coles sos definiciones ta insultando al nuesu idioma milenariu.