Dempués de la participación d’Iniciativa pol Asturianu nun alcuentru en Miranda de l Douro, xunto a entidaes de tol territoriu llingüísticu común, siguimos reflexonando alredor del llabor conxuntu qu’entendemos que pue llevase alantre.
Rellaciones colos estaos
Nel ámbitu estatal, y anque teamos falando de dos estaos estremaos, l’español y el portugués, bien ye cierto que pue trabayase de forma conxunta pa la puesta en marcha de midíes que caminen p’hacia l’establecimientu de pontes ente los territorios, al traviés de la nuesa llingua.
Les estratexes de trabayu conxuntes, sobre manera, de cara al gobiernu español, yá qu’embaxo esti mandatu ta la mayor parte del dominiu llingüísticu ástur, tienen que se potenciar abondo más. El reconocimientu de la llingua en munchos ámbitos del estáu central: concursos lliterarios, presupuestos xenerales del estáu, presencia n’ámbitos internacionales, cursos nos centros del Institutu Cervantes y otres munches midíes, pueden consiguise con más eficacia si’l trabayu ye conxuntu ya implica a más colectivos y territorios.
Rellaciones cola Xunión Europea
Nel ámbitu européu ye onde quiciabes seya más útil esti llabor a comuña. La Xunión Europea y el Conseyu d’Europa tienen ente los sos oxetivos afalar el plurillingüismu en tol territoriu del continente. Dambes instituciones reconocen a la nuesa llingua como una llingua en peligru y nun ye la primer vegada que llamen l’atención a los nuesos gobiernos por nun facer tolo que ta nes sos manes pa ponela en valor y consiguir la so sobrevivencia.
La Xunión Europea ye la única institución que mos axunta a tolos falantes del dominiu llingüísticu ástur y ye quien pue facer más dende l’ámbitu supranacional. El control del cumplimientu de la Carta Europea de les Llingües Minoritaries o Rexonales ha ser un trabayu conxuntu y empobináu a la reconocencia de los drechos llingüísticos de lleoneses, mirandeses y asturianos, por igual, dientro del marcu común européu.
Organismos internacionales
Apocayá, dende Iniciativa pol Asturianu anunciamos la prestación d’un informe al traviés de la entidá European Language Equality Network (ELEN), de la que formamos parte como entidá representante de la llingua asturiana. Esti informe llevóse yá a la Oficina del Altu Comisionáu de los Drechos Humanos de la Organización de les Naciones Xuníes (ONX) y nél falamos de la situación de violación de drechos humanos llingüísticos que viven n'Asturies los asturfalantes.
L'informe recueye los principales casos de discriminación y esplica l'estatus llegal del idioma asturianu, que nun tien reconocida la oficialidá magar les recomendaciones feches dende instituciones europees ya internacionales.
Esti informe, que na parte asturiana tuvo preparáu pola vocalía de Rellaciones Internacionales d'Iniciativa pol Asturianu, dirixida por Xosé B. Álvarez, va defendese en Xinebra, el viniente mes de febreru de 2015, como parte de la revisión periódica que la OHCHR fai sobre'l grau de respetu a los drechos humanos nos países miembros de la ONX.
Otru ámbitu onde la llingua ta reconocida y reivindicada ye’l de la UNESCO, que nos sos infomes, emitíos alredor de la situación llingüística del mundu, siempres alvierten de la situación de la llingua de Miranda, Lleón y Asturies.
Dende Iniciativa pol Asturianu vemos nestes estayes, mesmo na europea que na internacional, un espaciu claru de trabayu conxuntu, onde amosanos como una comunidá llingüística con puxu y encadarmada alredor del idioma milenariu, pue ser bien útil. Apurriendo una imaxe de xunidá y de voluntá de futuru pal nuesu idioma.
Ye una suerte cuntar con un piñu d’entidaes en toos estos territorios que compartimos una idea de xunidá de la nuesa llingua, ensin enfrentamientos reseñables y con una idea de collaboración que tamos seguros que podría dar más de sí.
Les entidaes de cada territoriu trabayamos n’ámbitos estremaos, con situaciones llegales y sociollingüístiques bien distintes. La collaboración énte nós ye bien importante, pue dar frutos, y nós enfotámonos na importancia de da-y puxu a esta collaboración y crear una rede d’entidaes que seya quien a llegar a tolos requexos d’esti vieyu dominiu ástur. Namás mos queda’l pasu d’organizamos de dalguna manera pa llevar alantre iniciatives n’andecha, adaptaes a la realidá de cada ámbitu, pero nel mesmu camín.
