Iniciativa pol Asturianu participó na convocatoria del Conseyu Asesor de la Llingua asturiana del Conceyu de Xixón, que se celebró'l xueves 7 de mayu. Una convocatoria que la organización reclamó que se celebrara talo y como afiten los estatutos yá que dende Iniciativa pol Asturianu entendemos que, magar tuviéremos nes caberes selmanes del mandatu del actual equipu de gobiernu, yera importante trabayar hasta l'últimu minutu en midíes a favor del asturianu.

Iniciativa pol Asturianu quixo aprovechar el caberu conseyu pa facer constar nel acta que nos caberos cuatros años de xestión en Política Llingüística, nun se dio nengún pasu alantre en materia de normalización llingüística en Xixón.  

Amás, recordamos l'incumplimientu de la Ordenanza municipal d’usu del asturianu nel ámbitu del Conceyu de Xixón, aprobada’l 13 de payares de 2008, ensin que se diera nengún pasu pa ponela en marcha nin siquiera de forma parcial. Especialmente llamentable ye la falta d’un Plan de Normalización Social del Usu del Asturianu, unu de los mandatos claros de la Ordenanza, nel so artículu 12. Sicasí, el repás a caún de los artículos de la Ordenanza ye una continuada visión de la falta de midíes d’esti equipu de gobiernu.

Fueron estos cuatro años perdíos na posibilidá de da-y mayor visibilidá al usu del asturianu, desaprovechando los recursos que destina’l Conceyu de Xixón pa tener puesta en marcha una Oficina de Normalización Llingüística.

Amás, les midíes propuestes dende esti Conseyu Asesor pa que se dieran pasos nesti camín nun fueron teníes en cuenta convirtiendo a esti órganu, (al que los sos miembros en representaciones d’entidaes del Conceyu acudimos de baldre y col únicu interés d’aportar propuestes al llabor de la Conceyalía) nun paripé y una perda de tiempu, a la vista del nulu interés del Sr. Rubiera por atender a les nueses peticiones y propuestes.

Iniciativa pol Asturianu va siguir trabayando dende esti órganu faciendo por meyorar la situación de la llingua asturiana en Xixón.