Yá tán equí toles noticies d'Iniciativa pol Asturianu nel mes caberu, nel boletín informativu #28.
Inaciu Galán, presidente d'Iniciativa pol Asturianu, y Sabel Tuñón, vocal voluntariáu de la organización, aconceyaron el xueves 6 de febreru cola directora de la Fundación Príncipe d'Asturies, Teresa Sanjurjo, nel llar d'esta organización. A lo llargo del conceyu felicitóse a la entidá por entamar a usar l'asturianu col primer pasu dau al asoleyar n'asturianu y gallego-asturianu les bases y fiches d'inscripción nel Premiu al Pueblu Exemplar d'Asturies, anque se recordó a la entidá "lo curtio d'esti pasu dau y la necesidá d'una mayor implicación de la FPA nel usu del asturianu".
Iniciativa pol Asturianu nes ondes entrevista nesti casu a Toño Martínez, llicenciáu n'Hestoria, Master n'Hestoria y Analís Sociocultural y anguañu Doctorandu n'Investigaciones Humanístiques, ta preparando’l proyeutu d'investigación sobre Sidra, ociu y sociabilidá en Siero y Noreña (1875-1937) too ello na Universidá d'Uviéu.
El proyectu televisivu d'Iniciativa pol Asturianu en collaboración con Infoasturies.net y Conocer Asturias, apurre nuevos conteníos na so canal de YouTube: entrevistes col artesanu cerveceru Serxu Solares y la cantante Silvia Quesada, y l'avance d'un alderique con ciclistes y xente d'esti deporte bien popular n'Asturies.
Hasta'l 9 de marzu ta abiertu'l plazu pa presentase a esti concursu nel qu'Iniciativa pol Asturianu collabora cola asociación Abierto Hasta el Amanecer. El concursu ¿Qué cuentes...? entamáu por esta entidá permite presentar testos n'asturianu a concursu.
Falóse nesti programa de medicina, col autor de la tesis doctoral "La Medicina Popular a través de la Lengua Asturiana”, Francisco Fernández-Guisasola, que denfendió la necesidá de que los médicos conozan la llingua asturiana, l'idioma de munchos de los pacientes asturianos.
El procesu de recuperación y normalización de la toponimia asturiana plantegóse como si esta parte de la realidá llingüística fuera daqué dafechu independiente al restu del idioma. Nun pue pretendese que nuna sociedá onde nun se normaliza una llingua, ésta seya normal solo na cuestión toponímica. La normalización de la toponimia tien que formar parte d'un procesu de normalización absolutu, nel que seya un elementu más, non discordante col restu de la realidá llingüística.
Nesta edición d'Iniciativa pol Asturianu nes ondes, María Esther García López, conceyala de cultura y educación de Castrillón, por Izquierda Xunida, que gobierna nel conceyu, denuncia que nun pue espresase n'asturianu nel plenu por mor de que-ylo pidieron dempués de que los funcionarios del mesmu allegaren nun saber asturianu pa facer l'acta.
El diariu El Comercio asoleyaba esti vienres 21 de febreru y coincidiendo col Día Internacional de la Llingua Materna, una carta abierta del presidente d'Iniciativa pol Asturianu, Inaciu Galán, dirixida al Presidente d'Asturies, el socialista Javier Fernández. Na carta faise un llamáu a Fernández, al so gobiernu y a la so formación, la FSA-PSOE, pa que camuden la so postura contraria a la oficialización del asturianu ya impulsen esti procesu hacia la normalidá de la llignua natal de munchos asturianos y asturianes.
Dende l'añu 2000 la UNESCO impulsa la celebración del Día Internacional de la Llingua Materna en tol mundu. L'asturianu, como llingua materna de munchos ciudadanos y ciudadanes, vive una situación de desigualdá y cuerre peligru real de desapaecer. Nesti día, puedes facer un xestu y collabora col so futuru faciéndote sociu d'Iniciativa pol Asturianu dende 20 euros al añu

Últimes noticies