La votación de les dos enmiendes a los Presupuestos Xenerales del Estáu 2014, propuestes por Iniciativa pol Asturianu y presentaes por Foro ya Izquierda Xunida nel Congresu de los Diputaos, tuvieron un amplísimu apoyu nes votaciones celebraes estos díes. Sicasí, Iniciativa pol Asturianu llamenta que los diputaos asturianos del PP votaren en contra d'estes enmiedes dempués de les pallabres positives qu'espresaren les diputaes populares Ángeles Ahuja y Carmen Maniega na visita que-yos fizo'l presidente de la organización nel mes de febreru, na sede parllamentaria, en Madrid.
Esti martes 19 de payares, Samuel Gradín, director del programa Iniciativa pol Asturianu nes ondes, organizó nel Auditoriu d'Uviéu la grabación del programa pilotu d'un proyectu audiovisual qu'Iniciativa pol Asturianu prepara a comuña colos medios de comunicación Infoasturies.net y ConocerAsturias.
La ONG ELEN (European Language Equality Network), perteneciente al Conseyu d'Europa y que trabaya pola defensa de les llingües europees en peligru, celebrará la so primer Xunta Xeneral Añal en París esti sábadu 22 de payares, y la llingua asturiana tará representada gracies a Iniciativa pol Asturianu, organización que ye miembro d'esta ONG dende la so fundación hai yá un añu y que cuntará nesta ocasión cola participación del representante de Rellaciones Internacionales de la organización asturiana.
Nesti nuevu programa d'Iniciativa pol Asturianu nes Ondes falamos con Fernando Padilla, mayestru que vivió'l procesu de camudamientu del nome al asturianu nel colexu "Cabu Peñes". Presentóse n'Avilés el nuevu trabayu discográficu del grupu Dixebra, "Tiempos Modernos", al rematar el conciertu atendiónos el so cantante Xune Elipe.
Iniciativa pol Asturianu súmase a la denuncia fecha dende'l Conceyu Universitariu pol Asturianu (CUPA), que tuvo conocimientu d’un nuevu casu de represión llingüística na Universidá d’Uviéu. Un alumnu de la Facultá de Formación del Profesoráu y Educación recibió una llamada de la Secretaría de la entidá, na qu’una de les trabayadores d’esta unidá lu amenzaba de forma maleducada y a voces por presentar un documentu n’asturianu, esixéndo-y que nun presentara “nunca más” nengún documentu nesta llingua, pues según dixo, les trabayadores de la Facultá “no tienen porqué saber bable”.
Estos díes atrás vivimos dalgunos casos de represión llingüística y pasos atrás pal asturianu que trescendieron a los medios, como la multa d’un policia en Mieres por tener una autorización d’aparcamientu n’asturianu, la prohibición de presentar documentos n’asturianu a un alumnu de la Universidá d’Uviéu o la eliminación del nome n’asturianu de dalgunes secciones del Festival de Cine de Xixon.
Esti llunes 11 de payares de 2013, a les 20 hores, nel Club de Prensa de La Nueva España en Xixón, asitiada nel Monte de Piedá de CaxAstur, xunto a la cai Institutu, va celebrase una presentación de la campaña d'usu del asturianu nes empreses d'Iniciativa pol Asturianu. Esta campaña trabaya pol fomentu del usu de la llingua asturiana n'empreses.
Iniciativa pol Asturianu inicia la so collaboración cola asociación Abierto Hasta el Amanecer cola so participación na organización del concursu lliterariu ¿Qué cuentes...? entamáu por esta entidá y nel qu'Iniciativa pol Asturianu collabora introduciendo l'asturianu na imaxe de la convocatoria, bases, etc. Dende la organización felicitamos a l'asociación xixonesa por animase col usu del asturianu nun ámbitu tan importante como'l de la mocedá, onde ye clave tresmitir l'asturianu a les xeneraciones vinientes.
Un mes más llega a los correos de tolos simpatizantes y socios d'Iniciativa pol Asturianu la información cola actividá más destacada de la organización. Si entá nun recibes el boletín informativu únvianos un corréu a contautu@s806295988.mialojamiento.es o soscríbite na páxina web de nueso.
La selmana pasada, Illán, el neñu del colexu Auseva al que la Conseyería d'Educación del Gobiernu d'Asturies negaba la posibilidá de dir a clases d'asturianu atopaba solución. El llamáu fechu pola familia, el propiu centru educativu ya Iniciativa pol Asturianu atrayía l'atención de la prensa y al dirixise dalgunos medios a la Conseyería, poques hores dempués del unviu de la nota de prensa, la Conseyería ufría a la familia una solución qu'anque nun ye satisfactoria del too, permite que'l neñu yá s'incorporare a les clases d'asturianu nel so centru.

Últimes noticies