Iniciativa pol Asturianu, al traviés de la so Vocalía d'Enseñu, vien de súmase a la denuncia del sindicatu SUATEA pola falta de previsión de la Conseyería d'Educación pa cubrir les places de mayestros d'asturianu y de gallego-asturiano, yá que col cursu entamáu siguen ensin profesoráu pelo menos 14 centros de Primaria y Secundaria. Iniciativa pol Asturianu ta recoyendo estos díes les quexes de padres y alumnos y va entama delles acciones pa tratar de camudar esta situación.
Yá ta disponible'l boletín informativu dixital d'Iniciativa pol Asturianu con toles noticies del mes de setiembre. El boletín ye una ferramienta comunicativa pa dar a conocer a los socios y collacios d'Iniciativa pol Asturianu l'actividá de la organización.
El domingu 15 de setiembre l'Atenéu Obreru de Xixón acoyó un aconceyamientu de la Xunta Direutiva d'Iniciativa pol Asturianu, abiertu como siempres a la militancia. A lo llargo del mesmu tomáronse deciones sobre les acciones que van llevase alantre nos meses vinientes, asina como un siguimientu de les actividaes en marcha.
El cantante del grupu Los Berrones ye'l convidáu nesta ocasión nel programa Iniciativa pol Asturianu nes ondes, presentáu por Samuel Gradín y emitíu pela rede d'emisores a lo llargo de toa Asturies y na nuesa canal n'Ivoox.
Tres la cabera resolución del Parllamentu Européu sobre les llingües europees en peligru d'estinción y la diversidá llingüística na Xunión Europea, Iniciativa pol Asturianu quier amosar el so prestu por esta resolución y faer una llamada por un cumplimientu del documentu dafechu.
Iniciativa pol Asturianu y la Universidá d'Uviéu tán acabante roblar un Conveniu de Coperación Educativa ente dambes entidaes, col envís de qu'Iniciativa pol Asturianu acueya na so organización a alumnos en práctiques de cualesquiera de les titulaciones de la universidá asturiana. El conveniu, robláu por Luis J. Rodríguez Muñiz, Vicerrector d'Estudiantes, ya Inaciu Galán, presidente d'Iniciativa pol Asturianu, tien una duración indefinida y como oxetivu " ye fomentar la formación práctica de los estudiantes de la Universidá d'Uviéu n'Iniciativa pol Asturianu".
La situación del asturianu ye complicada, esa ye una realidá. Y anque la sociedá asturiana tien una bona disposición pa col idioma y nun quier que desapaeza, lo cierto ye que namás una parte pequeña de la xente asturiano ta movilizao nesa llucha diaria que ye busca-y un futuru meyor a la nuesa llingua. Mientres, el restu, con mayor o menor simpatía, ven a esti movimientu de recuperación llingüística como dalgo ayeno a ellos.
Va delles selmanes y al ver que na páxina web de La Vuelta a España 2013 asoleyaben el Llibru de Ruta y les etapes que pasaben per Asturies nun teníen la toponimia oficial bien puesta, Iniciativa pol Asturianu unvió una carta a Unipubli, la empresa organizadora d’esti eventu deportivu esplicando los erros nel usu de la toponimia asturiana na so páxina y pidiéndo-yos el cumplimientu nos usos de la toponimia oficial pa topónimos como Llastres, Celoriu, Mieres del Camín, Piedrasblancas o La Rebollá, ente otres.
Una nueva edición d'Iniciativa pol Asturianu vien con entrevistes. La primera d'elles dedicada a los responsables de la canal de noticies Conocer Asturias. La segunda parte del programa ta dedicada a la Noite Celta de Porcía, una de les cites clásiques del branu asturianu.
Esti domingu 15 de setiembre a les 18 hores nel Atenéu Obreru de Xixón, asitiáu na cai Cuadonga 7, 1u izquierda, en Xixón (llocalización Google Mapes: http://acurti.es/3Ly ) va celebrase un nuevu aconceyamientu de la Xunta Direutiva de la organización. Siguiendo col compromisu de xestión tresparente de l'actual Xunta Direutiva, l'aconceyamientu sedrá como siempres abiertu a la participación de los asociaos que quieran averase pel mesmu.

Últimes noticies