La propuesta d’Iniciativa pol Asturianu cuntó colos sofitos de PSOE, Foro, Xixón Sí Puede, Izquierda Xunida y Ciudadanos

XIXÓN, 27/02/2019. Inaciu Galán, presidente d’Iniciativa pol Asturianu, intervino na tarde de güei nel plenu municipal del Ayuntamientu de Xixón pa esponer les razones de la propuesta de Declaración Institucional en defensa de la Oficina de Normalización Llingüística y de la Ordenanza y el Plan de Normalización presentada pola ONG.

Galán dixo que “va unos meses pudimos sentir na prensa ataques que consideremos graves al llabor desarrolláu en Xixón nel ámbitu de la normalización llingüística. Y paecíanos importante qu’esti plenu reafirmara la so posición hestórica de sofitu institucional consensuáu a estes polítiques, coincidiendo especialmente colos primeros quince años de funcionamientu de la Oficina de Normalización Llingüística”.

El representante de l’asociación comentó que “pidimos a esti plenu que demuestre’l so compromisu col cumplimientu de la Ordenanza de Normalización. Y pidimos tamién esi mesmu sofitu al llabor de la Oficina de Normalización Llingüística y a los y les trabayadores de so. Porque vienen siendo una ferramienta necesaria y útil pa poner en marcha les midíes que señalen la Ordenanza y los planes”.

“Pidimos que se siga construyendo un clima de consensu y respetu al rodiu del idioma. Que se sigan llevando alantre les midíes acordaes y necesaries. Al nuesu paecer habría facese más rápido, anque reconocemos que, en xeneral, vienen dándose pasos alantre. Y nun se pue negar que fueron mui bien acoyíos pola sociedá xixonesa. La protección de les llingües d’España ye un consensu presente na sociedá y nes instituciones dende los tiempos de la Transición. Y nun ye namás una voluntá política d’un partíu o dellos, sinón que ye un mandatu constitucional” añadió Inaciu Galán.

Inaciu Galán aclaró que “esta propuesta de declaración que facemos nun ye contra naide nin contra nengún grupu d’esta institución, sinón que quier precisamente sumar. Facemos un llamáu a tolos grupos políticos equí representaos pa dar güei un exemplu de consensu alredor d’un elementu patrimonial de la importancia d’un idioma y la cultura que lu acompaña”.

El presidente d’Iniciativa acabo diciendo que “tengamos una visión a llargu plazu, una visión xenerosa, trabayemos xuntos nesta defensa del patrimoniu cultural y llingüísticu de Xixón, d’Asturies, y tamién d’España, como lo ye del mundu, pa que nun se dea la situación na que tengamos de dar esplicaciones a los nuesos nietos cuando nos pregunten por qué nun ficimos dalgo cuando tovía se podía salvar l’asturianu.

LLEE LA INTERVENCIÓN ÍNTEGRA D’INICIATIVA POL ASTURIANU EQUÍ ⬇️

INTERVENCIÓN D’INACIU GALÁN NEL PLENU