“Queremos recordar qu’el llabor d’Iniciativa nestos años tamién tuvo presente a nivel européu pola nuesa collaboración con entidaes como ELEM y ALCEM, siendo fundadores d’esta última”
“A lo llargo d’estos años de trabayu llevamos la situación del asturianu a espacios como la ONU y al Comité d’espertos del Conseyu d’Europa, muérganu encargáu de controlar el cumplimientu de la Carta Europea de les Llingües”
UVIÉU, 8/05/2019. Inaciu Galán, presidente d’Iniciativa pol Asturianu, participó esta tarde nun eventu de cellebración del Día d’Europa n’Uviéu. El presidente de la organización aprovechó pa presentar la entidá y facer un repasu del so trabayu a nivel européu. Galán dixo que “güei festexamos el Día d’Europa faciendo un llamáu a defender la diversidá llingüística nel marcu européu. Porque dende Iniciativa pol Asturianu consideramos qu’el proyeutu d’Europa nun tien sentíu ensin tener en cuenta les llingües d’Europa y ensin defender esa diversidá llingüística. Queremos destacar como la Xunión Europea apuesta pola vertebración de les diverses cultures, nel respetu, na diversidá y la igualdá dientro d’un marcu de respetu y solidaridá; y non na imposición de les grandes llingües”.
El representante de la entidá añadió que “queremos recordar qu’el llabor d’Iniciativa nestos años tamién tuvo presente a nivel européu pola nuesa collaboración con entidaes como ELEM (Rede Europea d’Igualdá Llingüística) de la que Iniciativa ye miembru dende 2012 y ALCEM (Asociación poles Llingües y Cultures Europees Amenazaes), de la que somos fundadores. Estes dos organizaciones valieron pa denunciar la difícil situación na que s’alcuentra l’asturianu pola falta de reconocencia de los drechos llingüísticos de les y los asturfalantes”.
Galán recordó tamién que “a lo llargo d’estos años de trabayu llevamos la situación del asturianu a espacios como la ONU y al Comité d’espertos del Conseyu d’Europa, muérganu encargáu de controlar el cumplimientu de la Carta Europea de les Llingües. Iniciativa pol Asturianu va siguir trabayando con toos estos organismos col enfotu de faer que’l conflictu llingüísticu asturianu llegue a tolos niveles n’Europa y por que la voz de tolos falantes d’asturianu sía escuchada nel continente”.
Pa terminar, el presidente d’Iniciativa pol Asturianu recordó que “dientro del seminariu qu’organizamos pal 17 y 18 de mayu vamos aldericar tamién sobre la importancia de defender el plurillingüismu y vamos comprobar de primera mano como ye posible facelo na Europa de los pueblos y de les llingües”.
Siente equí les declaraciones d’Inaciu Galán, presidente d’Iniciativa pol Asturianu. Siente equí les declaraciones d’Inaciu Galán, presidente d’Iniciativa pol Asturianu.
