La organización denuncia la nula presencia del idioma na cartelería del eventu y la falta de presencia de la toponimia oficial na exposición de vehículos pertenecientes al parque móvil municipal
XIXÓN, 19/09/2019. Iván Llera, presidente d’Iniciativa pol Asturianu, llamentó güei la falta de la presencia del topónimu oficial de “Xixón” y la nula presencia del asturianu nes actividaes propies de la Selmana de la Movilidá organizada pol conceyu. El presidente de la entidá denunció que “na exposición de diferentes vehículos de distintes empreses municipales como EMA o EMULSA asitiaos na Plaza Mayor nun apaez la toponimia oficial de Xixón y tampocu na cartelería propia de la Selmana de la Movilidá”.
Llera apuntó que “faciendo un usu normal del idioma dientro d’estes campañes como la Selmana de la Movilidá o mesmamente nos vehículos municipales podemos llograr da-y visibilidá al asturianu y la toponimia oficial de la ciudá. Dende Iniciativa pol Asturianu pedimos que se siga rotulando en billingüe como se venía faciendo hasta agora”
El presidente de la organización recordó que “l’usu del asturianu con normalidá nun implica un coste mayor, nin xenera gastu estra, amás cola utilización de la toponimia en castellán el Conceyu de Xixón ta incumpliendo la Llei d’Usu”.
Pa terminar, Iván Llera pidió que “l’asturianu nun quede solo como un elementu pa trabayar dende la Conceyalía de Cultura, tien que ser un exe central de la acción de gobiernu y tien que tar presente en toles estayes y empreses municipales, dende Emulsa, Emtusa o la Policía Llocal, pa consiguir d’esta manera una presencia real y que permita la normalización del idioma”.
