“Amás de menguar el tamañu los testos n’asturianu na imaxe corporativa, les comunicaciones y les promociones feches nun recueyen nin siquiera la toponimia oficial”
Iniciativa pol Asturianu, a traviés del so presidente Inaciu Galán, demandó esta mañana una mayor presencia de la llingua asturiana dientro de la organización de los actos del Día d’Asturies qu’esta edición s’alcuentren nel conceyu de Casu. Tamién apuntó que “dende Iniciativa pol Asturianu creemos que l’asturianu tien que ser un elementu fundamental a la hora de facer una programación como la del Día d’Asturies”.
El presidente d’Iniciativa pol Asturianu manifestó que “la programación cultural y lliteraria n’asturianu nun puede arrequexase únicamente a los actos propios de la Selmana de les Lletres Asturianes. Hai milenta posibilidaes pa facer diferentes actividaes n’asturianu y que llamentablemente’l programa nun recueye. Resulta incomprensible que na celebración institucional y oficial del Día d’Asturies, l’asturianu tenga tan poca presencia”.
“Valoramos los conciertos de música n’asturianu pero tal paez que’l Gobiernu d’Asturies quixere esconder l’usu del asturianu. Nel anunciu promocional, llocutáu con una voz en castellán, apaecen nun tamañu de lletra ilexible unos rótulos col testu traducíu al asturianu, dexando en testimonial ya invisible la presencia del idioma nesti audiovisual, nel día que xustamente ye’l celebración de les señes d’identidá d’Asturies” añadió Inaciu Galán.
Galán acabó denunciando que “nun ye solo que na programación haya poca presencia del asturianu, ye que l’usu y la presencia del asturianu nes comunicaciones ye insuficiente. Amás de menguar el tamañu los testos n’asturianu na imaxe corporativa, les comunicaciones y les promociones feches nun recueyen nin siquiera la toponimia oficial”.
