La entidá anima a facer presente la toponimia tradicional agora oficializada nel usu diariu de l’alministración

“Dende Iniciativa pol Asturianu reclamamos la recuperación de la presencia del idioma n’alcuentros como la Muestra de Folclor d’Uviéu onde va años yá taba presente”

«Pa Iniciativa pol Asturianu ye una bona noticia que la capital d’Asturies dempués de tantos años tenga aprobada la toponimia»

XIXÓN 20/03/2019 Inaciu Galán, presidente d’Iniciativa pol Asturianu, fixo güei unes declaraciones al rodiu de l’aprobación de la toponimia d’Uviéu nes que comentó que “Iniciativa pol Asturianu felicita al Conceyu d’Uviéu pola aprobación de la topomia y anima a facela presente en tolos ámbitos. Dende la nuesa asociación queremos facer un llamáu a los responsables del conceyu a mantener un esfuerciu especial y usar el nome oficial de la ciudá y el conceyu. Nesi sentíu, sedría mui positivo, visible y barato entamar a facelo nes redes sociales corporatives del ayuntamientu y de les conceyalíes”.

Galán dixo tamién que “dende Iniciativa pol Asturianu reclamamos la recuperación de la presencia del idioma n’alcuentros como la Muestra de Folclor d’Uviéu onde va años yá taba presente”.

“Yá col PP de Gabino de Lorenzo el topónimu tuvo dalguna presencia en distintes actividades rellacionaes cola conceyalía de Cultura, pero dempués l’usu del asturianu desapaeció de les actividades municipales, hasta que nesti mandatu últimu volvió a entamar a usase” comentó’l representante d’Iniciativa pol Asturianu.

P’acabar, Inaciu Galán añadió que “pa Iniciativa pol Asturianu ye una bona noticia que la capital d’Asturies dempués de tantos años tenga aprobada la toponimia y esperamos qu’a partir d’agora la toponimia oficial tenga la presencia que-y cuerrespuende pola Llei d’Usu y la llexislación española, esto ye, en tolos ámbitos oficiales ha apaecer la forma doble Oviedo/Uviéu, asina como’l restu de topónimos oficializaos”.