El vienres pasáu, día 8 de marzu, con motivu del día de la muyer, Iniciativa pol Asturianu quixo vindicar el papel de les escritores asturianes. A lo llargo de la hestoria éstes foren pegoyu fundamental, non solo por calterner l’idioma, sinón tamién por asitiar a la lliteratura asturiana como una de les llingües europees que tienen a más muyeres como referente creativu. Amás, munches d’elles foren finxu, nel so momentu, de la escritura n’asturianu n’époques nes que nun yera fácil el so papel nel ámbitu les lletres.
Esti añu Iniciativa pol asturianu recordó’l papel fundamental que xugaron pa la nuesa lliteratura dalgunes d’estes muyeres que formaron parte de movimientos lliterarios d’estremaes dómines, dende’l sieglu XVIII con Xosefa Xovellanos, hasta’l XX con Ánxeles López Cuesta, pasando por Enriqueta González Rubín, a quien debemos que l’asturianu seya la única llingua europea que tien por primer novelista a una muyer.
Delles, anguaño más escaecíes, prestaríanos que pasaren a tar presentes na memoria colectiva a l’altor que’l so valir artísticu merez. Convidámosvos a toes y toos a afondar na lliteratura d’estes grandes muyeres.
